Ռուսաստանը դեմ է Սաուդյան Արաբիայի նավթային օբյեկտների նկատմամբ հարձակման համար Իրանին մեղադրելուն, չկա ոչ մի ապացույց: Այս մասին հայտարարել է ՌԴ նախագահ Վլադիմիր Պուտինը՝ Ռուսական էներգետիկ շաբաթվա ընթացքում, փոխանցում է РИА Новости-ն:

Պատասխանելով հարցին, թե ինչպես է նա վերաբերում Սաուդյան Արաբիայի նավթային օբյեկտների նկատմամբ հարձակմանը, Պուտինը պատասխանել է. «Մենք դատապարտում ենք դա, բայց մենք դեմ ենք, որպեսզի այդ հարձակման համար մեղադրվի Իրանը, քանի որ ոչ մի ապացույց չկա»: Պուտինը նշել է նաև, որ երեկ Իրանի նախագահ Հասան Ռոհանիի հետ հանդիպմանը նույնպես քննարկել են այդ հարցը, և Իրանի նախագահը նշել է, որ երկիրը պատասխանատվություն չի կրում կատարվածի համար և անհասկանալի է համարում որոշ երկրների ղեկավարների դիրքորոշումը, որոնք առանց բավարար հիմքերի և առանց սպասելու միջազգային հետաքննության արդյունքներին, մեղավոր են ճանաչել հենց Իրանին:

ՌԴ նախագահն ընդգծել է նաև, որ դեպքի հետ կապված՝ միջազգային շուկայում տատանումներ իրապես եղել են, բայց դրանք վերացել են ընդամենը մեկ շաբաթում, և Brent նավթի գինը նորից դարձել է մեկ բարելի համար 60 դոլարից պակաս: