ՀՀ վարչապետ Նիկոլ Փաշինյանը պնդում է՝ Ամուլսարի շահագործման հարցի ուսումնասիրման ժամանակ իր կողմից առաջին իսկ առաջադրված հարցը եղել է Ջերմուկի ապագան՝ որպես առողջարանային քաղաք։ «Ես ինքս պայման էի առաջադրել, որ սկզբունքային է, թե Ջերմուկի ապագան ինչպիսի՞ն է լինելու։ Հիմա արդյոք մենք ունե՞նք այս հարցի պատասխանը՝ արդյոք մենք սրանով վերջ չե՞նք դնում Ջերմուկի ճակատագրին՝ որպես առողաջարանային քաղաք։ Այս ամենի համադրության արդյունքում իմ պատասխանը միանշանակ է՝ ո՛չ, ինչո՞ւ, որովհետև Ջերմուկ քաղաքի առողջարանային էության հիմնաքարը հանքային ջրերն են, եթե Ջեմուկի հանքային ջրերին և ընդհանրապես ջրերին ոչ մի վնաս չի լինելու», - ասաց Փաշինյանն իր ֆեյսբուքյան ուղիղ եթերում։ Վարչապետը ներկայացրեց միջազգային փորձաքննության արդյունքները Ամուլսարի հանքի շահագործման հարցում, որը Քննչական կոմիտեն ներկայացրել է կառավարության նիստին: Նա նշեց, որ վատագույն դեպքում հանքի շահագործման արդյունքում վնասը այնքան քիչ է լինելու, որ հնարավոր չի լինելու չափել: «Եթե  օրինակ մեկը ենթադրենք Սևանի ափին իր մեքենան լվանում է, դա, անշուշտ, բնապահպանական վնաս է հասցնում Սևանա լճին, բայց դա այնքան փոքր է, որ լաբորատորիայով ուսումնասիրենք, չենք կարող գտնել հասցրած վնասը: Մի օրինակ էլ բերեմ. հիմա Սևանի ափամերձ բնակավայրերի և Սևանի ափին մարդու գործունեության հետևանքով Սևանին տասնյակ, եթե ոչ 100-ավոր անգամներ ավելի մեծ վնաս է պատճառվում, քան կարող է Ամուլսարի գործունեությանն հետ կապված ֆորսմաժորի դեպքում լինել»,-ասաց նա և նշեց, որ Քննչական կոմիտեի նախագահը ներկայացրել է, որ Ջերմուկի ջրերի համար նախագիծը որևէ վտանգ չի պարունակում, իսկ  Արփա-Որոտան գետերի ջրային համակարգի վրա ազդեցության ռիսկերը կառավարելի են: Վարչապետն ասաց, որ «Էլլարդ»-ը նշում է, որ կան այսպիսի անորոշություններ, բայց նույնիսկ այդ դեպքում, եթե Լիդիանը կիրառի 16 մեղման միջոցներ, ապա ռիսկերը կլինեն կանխատեսելի, այսինքն`ոչ մի լիտր աղտոտված ջուր չի լինի, և Լիդիանն ասում է, որ այդ մեղման միջոցներից տասը նախատեսել են, և հինգն էլ կներգրավվեն, և Քննչական կոմիտեն էլ գալիս է այդ եզրակացության: