Քալիֆորնիայի նահանգային խորհրդարանի անդամ Լորա Ֆրիդմանը նահանգային օրենսդիր մարմնի նիստում, մարտի 26-ին ներկայացրել է թիվ 37 միացյալ բանաձեւը, որը 2018 թվականի ապրիլի 24-ը հռչակում է «Կալիֆորնիայում Հայոց ցեղասպանության 103-րդ տարելիցի ոգեկոչման օր», հաղորդում է «Ասպարեզը»:
Ֆրիդմանին այս հարցում զորակցել են Քալիֆորնիայի օրենսդիր մարմնի հայկական համախմբման անդամներ Ադրին Նազարյանը, պատգամավորներ Սքաթ Ուիլքը եւ Էնթոնի Պորտանտինոն։
Ֆրիդմանը հիշեցրել է, որ հայաշատ Գլենդելի եւ Քալիֆորնիայի հայերն ապրիլի 24-ին կոգեկոչեն հայ ժողովրդի դեմ տեղի ունեցած սարսափելի ոճիրները՝ միաժամանակ խոստանալով նորոգել ատելության եւ անհանդուրժողականության դեմ պայքարն ամբողջ աշխարհում:
«Այս բանաձեւը առիթ է Քալիֆորնիայի բնակիչների համար որ հարգանքի իր տուրքը մատուցի միլիոնավոր հայ զոհերի հիշատակին եւ ղեկավարներից պահանջի՝ դատապարտել Հայոց ցեղասպանության պատմական իրողությունն ուրանալու յուրաքանչյուր փորձ»,-նշել է Ֆրիդմանը: Բանաձեւում նշվում է նաեւ Օսմանյան Կայսրության մեջ ապրած փոքրամասնություններին օժանդակության հասած բարեգործական ջանքերի մասին: Ֆրիդմանը այս բանաձեւը կընթերցի ապրիլի 23-ին՝ խորհրդարանում նախատեսված քվեարկության ժամանակ:
