ՀՀ ԱԺ Իմ քայլը խմբակցության պատգամավոր, «Երկրապահ կամավորականների միության» նախագահ Սասուն Միքայելյանը եկավ Երեւան-Սեւան ճանապարհին բողոքի ակցիա իրականացնողների մոտ: Նշենք, որ Սեւանա լճի հարակից լողափերի տնտեսվարողները բողոքի ակցիա են իրականացնում: Նրանք պահանջում են, որպեսզի կառավարության ներկայացուցիչները հայտարարեն, որ Սեւանում լողալը վտանգավոր չէ:
Նրանց խոսքով՝ Առողջապահության նախարարության տարածած հայտարարությունից հետո մարդիկ չեն գալիս Սեւան եւ իրենց գործը տուժում է:
«Սա համարում ենք նախազգուշացում, եթե մինչեւ չորեքշաբթի էդ ձեր պահանջը չկատարվի, էդ հայտարարությունը չարվի ես կգամ ձեր հետ կկանգնեմ ստեղ»,- դիմելով ակցիայի մասնակիցներին ասաց Սասուն Միքայելյանը:
Ակցիայի մասնակիցները պահանջում էին Շրջակա միջավայրի եւ Առողջապահության նախարարներին, ինչին Միքայելյանն արձագանքեց. «Նախարաներն եկան ստե ի՞նչ պիտի ասեն»:
Ակցիայի մասնակիցների մոտ է նաեւ Գեղարքունիքի մարզպետ Գնել Սանոսյանը եւ Սեւանի քաղաքապետ Սարգիս Մուրադյանը:
Միքայելյանը խոստացավ, որ հարցին լուծում կտրվի, ակցիայի մասնակիցներն էլ որոշեցին բացել ճանապարհը՝ մինչեւ չորեքշաբթի: Միքայելյանը նշեց, որ այդ ճանապարհով լագեր է գնում եւ Սեւանում լողալու է:
Լրատվամիջոցները Միքայելյանից հետաքրքրվեցին, կառավարության անդամները չորեքշաբթի կհայտարարե՞ն արդյոք, որ Սեւանը մաքուր է, Միքայելյանը պատասխանեց. «Կամ պիտի հայտարարեն, կամ ես էլ կգնամ ժողովրդի հետ ակցիա կանեմ: Մարդիկ մի կտոր հացի փող են առնում սրա համար: Ամեն տարի սենց մի բան ասում են: Եթե թունավոր է ցրտերն ինչի՞ չեն սարքում»:
armtimes.com
00:00:00
