Խորհրդարանում քննարկվում է 2018  թվականի բյուջեի կատարողականի տարեկան հաշվետվությունը։ Ֆինանսների նախարար Ատոմ Ջանջուղազյանը նշեց՝  2018 թվականին հաջողվել է պահպանել մակրոկայունությունը, հարկաբյուջետային ու ֆինանսական համակարգի կայունությունը, ըստ այդմ՝ նախատեսված ծրագրերը կատարվել են ակնկալված չափերով։ Ֆինանսների նախարարը շեշտեց՝ նախորդ տարում արձանագրվել է 5,2 տոկոս տնտեսական աճ, թեև կանխատեսված էր 4,5 տոկոս տնտեսական աճ: «Կանխատեսումներն իրականացնելիս ենթադրվում էր, որ տնտեսական աճը կլինի 2,5 տոկոսից 5 տոկոսի շրջանակում: Համաշխարհային տնտեսության աճը եղել է 3,6 տոկոս, ԵՄ երկրները 2,1 տոկոս տնտեսական աճ են գրանցել,  իսկ  ԵՏՄ երկրները՝ 2,5 տոկոս»,-   ասաց ֆինանսների նախարարը։ Ատոմ Ջանջուղազյանը նշեց՝ իրականացվելու են  նոր  վարկային ծրագրեր։ «Մենք  ընդհանրապես այն տրամաբանությամբ ենք առաջնորդվում, որ պետք  է ոչ թե այդ  միջոցները օգտագործելով վարկերի տոկոսները մարել, այլ փոխառու միջոցները մեր տնտեսության մեջ այնպիսի աճ ունենանք, որ իրենց տեսակարար կիռով  և ազդեցության չափով նվազագույնի հասցվի։ Ձգտելու ենք դրա կառավարելիության  աստիճանը բարձրացնել, և որ դա մեզանից մեծ ջանք չպահանջի», -  նշեց Ատոմ Ջանջուղազյանը։