Ռումինական Վասլույ շրջանի 63-ամյա բնակիչ Կոնստանտին Ռելիուն, ով 2016 թվականին մահացած է ճանաչվել, չի կարողացել դատարանում ապացուցել, որ ինքը ողջ է և, հետևաբար, չի կարողացել չեղյալ համարել սխալմամբ տրված մահվան վկայականը: Ինչպես տեղեկացնում է  «Ռիա Նովոստի»-ն, այդ մասին հայտնում են ռումինական ԶԼՄ-ները: Քանի որ նա պարտվել է դատական գործը, այսուհետ նա իրավական տեսանկյունից գոյություն չունի:

«Փաստաթղթերով ես մեռած եմ, այնինչ ես ողջ եմ: Չունեմ եկամտի որևէ աղբյուր: Քանի որ համարվում եմ մեռած, չեմ կարող աշխատանք գտնել այս երկրում, ոչնչով չեմ կարող զբաղվել»,-հայտարարել է Ռելիուն դատական լսումից հետո: Ռելիուն 1992 թվականին Ռումինիայից մեկնել է Թուրքիա արտագնա աշխատանքի: Ընտանիքի անդամների հետ վեճերի պատճառով նա կորցրել է հարազատների հետ կապը: 2013 թվականին նրա կինը դատարան է դիմել ամուսնուն մահացած ճանաչելու խնդրանքով, քանի որ երկար ժամանակ ամուսնուց որևէ տեղեկություն չի ստացել: Կնոջ դիմումը բավարարվել է 2016-ին: Այս տարի թուրքական իշխանությունները հայտնաբերել են, որ Ռելիուի փաստաթղթերը, որոնցով նա գտնվում է Թուրքիայի տարածքում, ժամկետանց են և նրան հետ են ուղարկել Ռումինիա: Երկիր ժամանելով` պարզվել է, որ նա համարվում է մահացած: Արդարությունը վերականգնելու նպատակով տղամարդը ստիպված կլինի դատարան դիմել նոր հայցով: