SHAMSHYAN.com-ը մարտի 1-ին լուր է հրապարակել Նարեկ Սարգսյանի վերաբերյալ: Մասնավորապես, ինչպես ավելի վաղ հայտնել էր ֆոտոլրագրող Գագիկ Շամշյանը, փետրվարի 28-ին, ոստիկանության Երևան քաղաքի վարչության օպերատիվ կառավարման կենտրոն էր ահազանգել քաղաքացի Տիգրան Սարգսյանը և հայտնել, որ 2012 թվականի դեկտեմբերի 23-ին քաղաքացի Նարեկ Սարգսյանը Երևան քաղաքի Եզնիկ Կողբացու փողոցի 50/ա հասցեում գտնվող գետնանցումում ցանկացել է հրազենով սպանել իր ընկերոջը։
Այն անձնավորությունը, որին՝ ըստ Տ. Սարգսյանի, պետք է սպաներ Նարեկ Սարգսյանը, այս պահին կալանավորված է ՀՀ քր. օր-ի 176 հոդվածի 2-րդ մասի մեղադրանքով և գտնվում է Նուբարաշենի բանտում։ Նա 23-ամյա Հ. Հ.-ն է։ Ահազանգողը հայտնել էր նաև, որ Ն. Սարգսյանը կամքից անկախ հանգամանքներում հանցագործությունը ավարտին չի հասցրել, սակայն վերջինս դանակով հարվածել է Հ. Հ.-ի կրծքավանդակին՝ պատճառելով վնասվածք։
2012 թվականի դեկտեմբերի 23-ի այդ միջադեպին՝ բացի Նարեկ Սարգսյանից, մասնակցել է նաև ԱԺ նախկին պատգամավոր, «Հայկոոպի Մարաշցի Աբո» մականվամբ Աբրահամ Մանուկյանի որդին՝ Արթուրը: Մեր տեղեկություններով, միջադեպին մասնակցել է նաև «Մաֆ» մականվամբ Հակոբ Հովհաննիսյանը, ով դեռ տարիներ առաջ հակասություններ է ունեցել Ն. Սարգսյանի հետ, ու «Մաֆը» իր մտերիմների մոտ հայտնել է, որ ինքը անհամբեր սպասում է, թե երբ են «Գոնսալես» անունը ստացած Ն. Սարգսյանին Չեխիայից արտահանձնելու Հայաստան:
SHAMSHYAN.com-ի տեղեկություններով, կա մտավախություն, որ 23-ամյա Հ. Հ.-ի անվտանգությունը երաշխավորված չէ, ու հնարավոր է նրա տեղափոխությունը թիվ 1 «Կենտրոն» քրեակատարողական հիմնարկ: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
00:00:00
