Հատուկ դպրոցներում արձանագրվել են առանց օրինական հիմքերի երեխաների հայտնվելու դեպքեր, երեխաների միջեւ բռնության, աշխատանքի շահագործման մասին տվյալներ․ Պաշտպանն ամփոփում է մշտադիտարկման արդյունքները ՄԻՊ-ից  հայտնում են, որ Մարդու իրավունքների պաշտպանն ամփոփել է երեխաների խնամք եւ պաշտպանություն իրականացնող 8 հատուկ դպրոցներում, 1 գիշերօթիկ խնամքի հաստատությունում եւ 1 մանկատուն կատարած մշտադիտարկման այցերի արդյունքները: Աշխատանքի եւ սոցիալական հարցերի, Կրթության եւ գիտության նախարարության, Երեւանի քաղաքապետարանի եւ Շիրակի մարզպետարանի ենթակայությամբ գործող հաստատություններում արձանագրվել են հետեւյալ հիմնական խնդիրները՝ երեխաների նկատմամբ եւ երեխաների միջեւ բռնության, ինչպես նաեւ աշխատանքի շահագործման մասին տվյալներ. դեղերի պահպանման եւ խոտանման կարգի խախտումներ, խոհանոցային տարածքների սանիտարահիգիենիկ վիճակի հետ կապված խնդիրներ. հայտնաբերվել է ժամկետանց սնունդ, ինչպես նաեւ դեպքեր, երբ երեխաներին չի տրամադրվել բավարար քանակությամբ ձկնեղեն, կաթնամթերք եւ միրգ. հաստատությունների ննջասենյակներում եղել են գերբնակեցման դեպքեր. հայտնաբերվել են թերություններ՝ կապված գրեթե բոլոր հաստատություններում ընդունելության փաստաթղթերի հետ (օրինակ՝ առկա չեն եղել կրթության առանձնահատուկ պայմանների կարիքի վերաբերյալ վկայագրեր, ծնողների դիմումներ, ուղեգրեր). հատուկ նպատակով նախատեսված մեկուսարանները օգտագործվել են որպես պահեստ, իսկ մեկուսարաններում գտնվող անկողնային պարագաները եղել են սանիտարահիգիենիկ անընդունելի վիճակում: Անգամ մեկ դեպքում հայտնաբերվել են կրծող կենդանիների արտաթորանքներ. մի շարք հաստատությունների գործունեությունը չի համապատասխանում այդ հաստատության համար սահմանված տիպին. արձանագրվել են լոգարանների պատուհանների թափանցող ապակիներ, որի պատճառով լոգարանի ներսի հատվածը տեսանելի է եղել նույն հարթության վրա գտնվող բակից. արձանագրվել են դեպքեր, երբ զուգարանակոնքերն առանձնացված չեն եղել միջնորմերով․ սանհագույցներում հիմնականում բացակայել է զուգարանի թուղթ, հեղուկ օճառ եւ այլ սանիտարահիգիենիկ պարագաներ. մի շարք հաստատությունների ննջասենյակներում վարագույրներ կախված չեն եղել, բացակայել են ներքնակներ, անձնական հիգիենայի պարագաներ, հայտնաբերվել են աղտոտված անկողնային պարագաներ, անբավարար քանակությամբ կողապահարաններ, աշխատանքային ժամերից հետո հաստատություններում բուժանձնակազմ, որպես կանոն, չի լինում. շենքային պայմանները հիմնականում հարմարեցված չեն հաշմանդամություն ունեցող երեխաների համար. որոշ հաստատություններում բացակայել են բողոքարկման արկղեր եւ բողոքարկման ընթացակարգեր նախատեսված չեն եղել եւ այլն: Առանձին հաստատությունների հետ կապված արձանագրվել են նաեւ դրական զարգացումներ: Նշված բոլոր հաստատություններում մշտադիտարկման արդյունքներն ամփոփվել են միջազգային ընդունված պահանջներին համապատասխան: Դրանք լուծումների կոնկրետ առաջարկություններով ներկայացվել են իրավասու մարմիններին: Մարդու իրավունքների պաշտպանը հետեւողական է լինելու արձանագրված խնդիրների լուծման հարցում: