Գերմանիայի ներքին գործերի նախարարությունն արգելել է Osmanen Germania թուրք ազգայնական բայքերների գործունեությունը, որոնք կասկածվում են կազմակերպված հանցավոր գործունեություն ծավալելու մեջ: Ինչպես տեղեկացնում է Washington Post-ը, Գերմանիայի ՆԳ նախարար Հորստ Զեեհոֆերը երեքշաբթի հայտաարարել է, որ բայքերների գործունեությունը հակասում է օրենքին և սպառնալիք է ներկայացնում հասարակության համար: Ենթադրվում է, որ Osmanen Germania բայքերների և բռնցքամարտի ակումբը գումար և հրահանգներ է ստացել Թուրքիայի նախագահ Ռեջեփ Թայիփ Էրդողանի վստահված անձ հանդիսացող Մեթին Քյուլյունքից՝ Գերմանիայում քրդերին և Էրդողանի հակառակորդներին հետապնդելու համար: Հայտնի է, որ 2016 թվականին Osmanen Germania ակումբի անդամները Մեթին Քյուլյունքի հրամանով մասնակցել են Բունդեսթագի կողմից Հայոց ցեղասպանության ճանաչման դեմ իրականացվող բողոքի ակցիաներին: