«Ռոսատոմ»-ը հայտնել է, որ Սև ծովում ուկրաինական ծովային անօդաչու սարքերի հարձակման հետևանքով խորտակվել է նավ։
«Այս գիշեր Սև ծովի ջրատարածքում՝ Նովոռոսիյսկ քաղաքից 130 ծովային մղոն հեռավորության վրա, Ուկրաինայի զինված ուժերի մարտական ծովային դրոնների հարձակման հետևանքով վնասվել և խորտակվել է FESCO ընկերությանը պատկանող «Յանինա» բեռնատար նավը»,- հայտարարել են պետական կորպորացիայից։
«Ռոսատոմ»-ի գլխավոր տնօրեն Ալեքսեյ Լիխաչովը նշել է, որ անօդաչու սարքերը նավի վրա հարձակվել են Մոսկվայի ժամանակով ժամը 22:00-ի սահմաններում։
«Դա սովորական կոնտեյներային նավ էր, որը շարժվում էր միջազգային ջրերում և տեղափոխում քաղաքացիական նշանակության բեռներ՝ սառեցված սննդամթերքից մինչև շինարարական և հարդարման նյութեր»,- ընդգծել է նա։
Լիխաչովի խոսքով՝ անձնակազմի բոլոր 17 անդամները փրկվել են և իրենց ինքնազգացողությունը բավարար է։ Նրանց ափ են հասցրել Սևծովյան նավատորմի ծովային ավիացիայի իրականացրած փրկարարական գործողության շնորհիվ։
