Եվրոպական խորհրդի նախագահ Անտոնիո Կոշտան և Եվրոպական հանձնաժողովի նախագահ Ուրսուլա ֆոն դեր Լայենը կլինեն հաջորդ երկուշաբթի կայանալիք Հնդկաստանի Հանրապետության օրվա տոնակատարության գլխավոր հյուրերը, տեղեկացնում է BBC News-ը։
Պետական ընթրիքներից և միջոցառման հանդիսավոր շուքից բացի, երկու առաջնորդների օրակարգում կլինի ավելի հրատապ հարց՝ Ասիայի երրորդ խոշոր տնտեսության հետ ազատ առևտրի շուրջ բանակցությունների առաջմղումը:
Սա տեղի է ունենում Եվրոպայի համար հատկապես բարդ աշխարհաքաղաքական պահի, երբ նախագահ Դոնալդ Թրամփը սպառնացել է սրել առևտրային պատերազմը եվրոպական դաշնակիցների հետ՝ ԱՄՆ-ի՝ Գրենլանդիային տիրանալու մտադրությանը դիմադրելու պատճառով:
Հյուրերի ընտրությունը նաև կարևոր դիվանագիտական ուղերձ է Հնդկաստանի կողմից. Դելին ամրապնդում է ռազմավարական և առևտրային կապերը աշխարհի հետ, քանի որ Վաշինգտոնի կողմից Հնդկաստանի նկատմամբ 50 տոկոսանոց մաքսատուրքեր սահմանելու հետևանքով ստեղծված փակուղային իրավիճակը տեղափոխվում է նոր տարի:
«[Սա] ազդակ է այն մասին, որ Հնդկաստանը վարում է դիվերսիֆիկացված արտաքին քաղաքականություն... և կախված չէ Թրամփի վարչակազմի քմահաճույքներից»,- կարծում է լոնդոնյան Chatham House վերլուծական կենտրոնի փորձագետ Կետիջ Բաջպային:
Ըստ որոշ տեղեկությունների, գործարքի մասին կարող է հայտարարվել արդեն հունվարի 27-ին, երբ երկու կողմերի առաջնորդները կհանդիպեն բարձր մակարդակի գագաթնաժողովում: Թե՛ ֆոն դեր Լայենը, թե՛ Հնդկաստանի առևտրի նախարար Պիյուշ Գոյալն այս համաձայնագիրն անվանել են «բոլոր գործարքների մայրը»՝ ընդգծելով այն կարևորությունը, որը նրանք տալիս են բանակցությունների ավարտին: Վերջիններս մոտենում են եզրագծին երկու կողմերի միջև գրեթե երկու տասնամյակ տևած լարված քննարկումներից հետո:
Այս դաշինքը կդառնա վերջին չորս տարում Հնդկաստանի կնքած ազատ առևտրի իններորդ համաձայնագիրը՝ հաջորդելով Մեծ Բրիտանիայի, Օմանի, Նոր Զելանդիայի և այլ երկրների հետ կնքված գործարքներին:
