Պենտագոնի քարտուղար Փիթ Հեգսեթի հրամանով ԱՄՆ զինված ուժերը Խաղաղ օվկիանոսում ևս մեկ նավ են ոչնչացրել, որն, ըստ ԱՄՆ-ի, օգտագործվել է թմրանյութերի մաքսանենգության համար: Այս մասին հայտնել է ԱՄՆ Հարավային հրամանատարությունը:

Հեգսեթը նախկինում հայտարարել էր «Հարավային նիզակ» (Southern spear) գործողության մեկնարկի մասին, որը թմրանյութերի դեմ պայքարի գործողություն է: «Պաշտպանության նախարար Փիթ Հեգսեթի հրամանով «Հարավային նիզակ» համատեղ աշխատանքային խումբը մահացու կինետիկ հարված է հասցրել ահաբեկչական կազմակերպության կողմից օգտագործվող նավին: Հետախուզությունը հաստատել է, որ նավը ներգրավված է եղել թմրանյութերի ապօրինի շրջանառության մեջ», - ասվում է հրամանատարության հայտարարության մեջ: «Նավի վրա գտնվող երեք նարկոահաբեկիչները սպանվել են: Նավը թմրանյութեր էր տեղափոխում Արևելյան Խաղաղ օվկիանոսում, իսկ հարվածը տեղի է ունեցել միջազգային ջրերում»:

Ըստ CNN-ի հաշվարկների, ԱՄՆ զինված ուժերը վերջին ամիսներին Լատինական Ամերիկայի ափերի մոտ 21 մոտոհրանավակ են ոչնչացրել՝ թմրանյութերի մաքսանենգության դեմ պայքարի պատրվակով, ինչի հետևանքով զոհվել է 83 մարդ։ Այդ հարվածներից մեկից հետո Կոլումբիայի նախագահ Գուստավո Պետրոն հայտարարել է, որ ամերիկյան գործողության հետևանքով զոհվել է ոչ թե թմրավաճառ, այլ իր երկրի ձկնորսը։