Արամ Խաչատրյանի անվան միջազգային մրցույթին այս տարի կմասնակցի 18 երաժիշտ։ Վերջիններս ընտրվել են նախընտրական ժյուրիի կողմից մրցույթին հայտ ներկայացրած հարյուրավոր դիմորդներից։
Այս տարի Խաչատրյանի անվան միջազգային մրցույթն անցկացվում է «դիրիժորություն» մասնագիտական կարգում։ Ընտրված 18 դիրիժորները ներկայացնում են աշխարհի 12 երկրներ՝ Ֆրանսիան, Արգենտինան, Հայաստանը, ԱՄՆ-ն, Հարավային Կորեան, Լատվիան, Թայվանը, Ավստրալիան, Չինաստանը, Կանադան, Մեծ Բրիտանիան, Ճապոնիան։
Ամենամյա մրցույթը մեկնարկում է հայ մեծանուն կոմպոզիտոր Արամ Խաչատրյանի ծննդյան օրը՝ հունիսի 6-ին։ Մրցութային ծրագրում ընդգրկված են նաև Խաչատրյանի ստեղծագործությունները։ Միջազգային ստուգատեսի նպատակն է բացահայտել երիտասարդ տաղանդավոր երաժիշտների, ինչպես նաև աշխարհում հանրահռչակել Խաչատրյանի երաժշտական ժառանգությունը։