Եթե վստահության խնդիր չլիներ, կամ խաղաղության պայմանագիրը կամ վաղուց ստորագրված կլիներ, կամ խաղաղության համաձայնագրի կարիքը չէր լինի: Այս մասին այսօր Հանրային հեռուստաընկերությանը տված հարցազրույցում ասաց ՀՀ վարչապետ Նիկոլ Փաշինյանը:
«Նաեւ վստահության խնդիրներն են պատճառը, որ խաղաղության համաձայնագրի համաձայնեցված տեքստում կա կարգավորում, այդ թվում վստահության բարձրացման միջոցների վերաբերյալ: Վստահության պակասը կամ բացակայությունը չեմ կարծում, թե անակնկալ պետք է լինի այն միջավայրում, որում մենք գտնում ենք:
Կողմերն ունեն իրենց պատկերացնումները, թե ինչ հայտարարություններով պետք է առաջնորդվեն եւ մեր պատկերացումն այն է, որ խաղաղության օրակարգը պետք է առաջ մտղվի, ինչը նշանակում է առերեսվել բոլոր բարդությունների հետ եւ դրանք փորձել լուծել ու հասցեագրել:
Մենք այսօր, ըստ էության ունենք փաստաթուղթ, որը ընդունելի է եւ Հայաստանի եւ Ադրբեջանի համար: Հաջորդ փուլը, տրամաբանորեն, պետք է լինի այդ փաստաթղթի ստորագրումը:
Ինչ վերաբերում է էսկալացիոն լուրերի տարածումը, կարծում եմ՝ դրա նպատակներից մեկն այն է, որ նման լուրերի հոսքի ներքո քողարկել բուն լուրը: Իսկ բուն լուրն այն է, որ խաղաղության համաձայնագրի տեքստը պատրաստ է եւ սպասում է ստորագրման, հետեւաբար պետք է ստորագրվի:
Ես արձանագրել եմ, որ պատրաստ եմ իմ ստորագրությունը դնել այդ տեքստի տակ»,- հայտարարեց Փաշինյանը: Նա նկատեց, որ հիմա էսկալացիայի որեւէ հիմք ու հիմնավորում չկա. «ՀՀ-ն եւ Ադրբեջանը ճանաչել են միմյանց տարածքային ամբողջականությունը, ինքնիշխանությունը, քաղաքական անկախությունը՝ ԽՍՀՄ հանրապետությունների սահմաններով»,- հայտարարեց վարչապետը:
