Ռուսաստանի անվտանգության դաշնային ծառայության (ԱԴԾ) կոլեգիայի նիստում ՌԴ նախագահ Վլադիմիր Պուտինը ծառայությանը հանձնարարել է լրացուցիչ միջոցներ ձեռնարկել երկրի պետական սահմանը պաշտպանելու և սահմանամերձ շրջաններում քաղաքացիների անվտանգությունն ապահովելու համար։ «Արմենպրես»-ի փոխանցմամբ՝ այս մասին հայտնում է «Իզվեստիյա» պարբերականը։
«Մենք պետք է շարունակենք մեծացնել սահմանների պաշտպանվածության խտությունը հնարավոր վտանգավոր տարածքներում՝ համագործակցելով բանակային ստորաբաժանումների, Ռուսաստանի ազգային գվարդիայի և ՆԳՆ ստորաբաժանումների, ինչպես նաև տեղական իշխանությունների հետ՝ սահմանամերձ բնակավայրերում մարդկանց անվտանգությունն ապահովելու համար», - ասել Պուտինը։
Բացի Ռուսաստանի սահմանների պաշտպանությունից, Պուտինը ԱԴԾ-ից պահանջել է վճռական և հարձակողական պայքար մղել ծայրահեղականության և ահաբեկչության դեմ: ՌԴ նախագահը հատուկ ուշադրություն է դարձրել գերատեսչության հակաահաբեկչական ներուժի մեծացմանը ռուս-ուկրաինական հակամարտության ընթացքում Ռուսաստանի վերահսկողության տակ անցած շրջաններում։
«Հենց այնտեղ տեղակայված ստորաբաժանումներն են պայքարում Կիևի ռեժիմի դիվերսիոն խմբերի դեմ», - ընդգծել է ՌԴ ղեկավարը։
Բացի այդ, նախագահ Պուտինը նշել է Ուկրաինայում ռազմական գործողությունների ընթացքում օտարերկրյա հետախուզական ծառայությունների ակտիվության և տեխնիկական հագեցվածության աճը։
Նա նշել է, որ հակահետախուզության մարմինների առջև ծառացած են կարևոր խնդիրներ։
