«Համավարակների մասին համաձայնագրի» շուրջ աշխատանքները պետք է ավարտին հասցվեն, քանի որ այն երկրներին հնարավորություն կտա ավելի արագ արձագանքել հաջորդ համավարակին, հայտարարել է ՄԱԿ գլխավոր քարտուղար Անտոնիո Գուտերեշը՝ Ժնևում անցկացվող Առողջապահության համաշխարհային 77-րդ տարեկան վեհաժողովին հղած տեսաուղերձի ժամանակ։
«Համավարակների մասին համաձայնագիրը հնարավորություն է ապահովելու, որպեսզի համաշխարհային առողջապահական համակարգը ավելի արագ արձագանքի, երբ զարգանա հաջորդ համավարակը։ Կոչ եմ անում համաձայնագրի շուրջ աշխատանքներն ավարտին հասցնել»,- ասել է Գուտերեշը։
Նշենք, որ ԱՀԿ անդամ երկրները 2,5 տարի առաջ որոշել են համաձայնագիր պատրաստել հաամավարակների մասին, ինչի շուրջ աշխատանքներ են տարվել։ ԱՀԿ-ում ավելի վաղ հայտարարել էին, որ թեպետ համաձայնագրի շատ դրույթներ ու մոտեցումներ համաձայնեցվել են, սակայն որոշ հարցերի շուրջ կան տարակարծություններ։
