Մոսկվայի հայկական եկեղեցում այսօր 35-ամյա Կարեն Ենգիբարյանի հոգեհանգիստն է, որը մարտի 22-ին «Կրոկուս Սիթի Հոլ»–ում տեղի ունեցած ահաբեկչության ժամանակ մարդկանց էր փրկել։ Տեղեկությունը հայտնում է ՌԻԱ Նովոստին։
Ենգիբարյանն օգնել է մարդկանց տարհանել այրվող «Կրոկուսից», իր բաճկոնը տվել է այն մարդուն, ում դուրս է բերել դահլիճից: Նա ծխահարվել էր, մրսել և ողբերգության հաջորդ օրը հայտնվել հիվանդանոցում։ Նրա կյանքը փրկել, ցավոք, չի հաջողվել։
«Հերոսներ չեն ծնվում, դառնում են։ Արտակարգ իրավիճակում գտնվող անձը հերոսություն է ցուցաբերել, փրկել է բազմաթիվ մարդկանց իր կյանքի գնով։ Ռուսաստանի հայերի միությունը ցավակցություն է հայտնում ընտանիքին և մերձավորներին, անհրաժեշտ օգնություն կցուցաբերվի»,- ՌԻԱ Նովոստիին հայտնել է Ռուսաստանի հայերի միության փոխնախագահ Տիգրան Հարությունյանը։
Նա նշել է՝ թեպետ պաշտոնապես Կարենը «Կրոկուսում» ահաբեկչության զոհի կարգավիճակ չունի, բայց անուղղակիորեն նա այդ ահաբեկչության փաստացի զոհ Է։ Միությունը հոգ կտանի այդ կարգավիճակը փոխելու մասին, որպեսզի ընտանիքին օգնություն ցուցաբերվի:
Հանգուցյալի մտերիմներն ու ընկերները գործակալությանը պատմել են, որ նա խելացի էր, բարի, ուժեղ։
Ենգիբարյանը եղել է հայկական եկեղեցու ծխական, ինչպես նաև հայկական երիտասարդական միության անդամ: Նա վերջերս էր ամուսնացել, զույգը երեխաներ չուներ։
Հիշեցնենք` մարտի 22-ին Մոսկվայի շրջանի «Կրոկուս Սիթի Հոլ»–ում համերգից առաջ հրաձգություն է եղել, այնուհետև հրդեհ է բռնկվել: Տուժածների թիվը հասել է 360–ի (այդ թվում` 11 երեխա), զոհերինը` 144–ի։
Ռուսաստանի քննչական կոմիտեն ահաբեկչության մասին քրեական գործ է հարուցել։ Ձերբակալվել է 11 մարդ, այդ թվում` 4 ահաբեկիչները` Դալերջոն Միրզոևը, Ռաչաբալիզոդա Սաիդակրամին, Մուհամադսոբիր Ֆայզովը և Ֆարիդունի Շամսիդինը։ Նրանց ցմահ ազատազրկում է սպառնում։ Նրանք, ինչպես նաև ահաբեկչությանն օժանդակելու մեջ մեղադրվող Իսրայել, Դիլովար և Ամինչոն Իսլոմովները կալանավորվել են մինչև մայիսի 22-ը։
Տաջիկստանում ուժայինները 9 մարդու են ձերբակալել «Կրոկուս Սիթի Հոլ»–ում ահաբեկչություն իրականացնողների հետ կապեր ունենալու համար:
