2023 թվականին Գերմանիայի կառավարությունը 40 տոկոսով ավելի շատ թույլտվություններ է տվել զենքի արտահանման համար, քան նախորդ տարի՝ ավելի քան 11,7 միլիարդ եվրոյի։ Սա Գերմանիայի ողջ պատմության մեջ ամենաբարձր ցուցանիշն է, հայտնում է dpa գործակալությունը՝ հիմնվելով   Բունդեսթագի պատգամավոր Սառա Վագենկնեխտ Սևիմ Դագդելենի հարցմանը Էկոնոմիկայի նախարարության պատասխանի տվյալների վրա։

Այս տեղեկատվության համաձայն, 2021 թվականին սահմանված նախորդ ռեկորդը՝ 9,35 միլիարդ եվրոն, դեկտեմբերի կեսերին արդեն գերազանցվել է 25 տոկոսով։

Փաստաթղթում ներկայացված տվյալները վերաբերում են 2023 թվականի հունվարի 1-ից դեկտեմբերի 12-ն ընկած ժամանակահատվածին, որի ընթացքում կառավարական կոալիցիան հաստատել է 6,15 միլիարդ եվրոյի զենքի և 5,67 միլիարդ եվրոյի այլ ռազմական արտադրանքի արտահանումը։ Ընդհանուր գումարի գրեթե 90 տոկոսը նախատեսված էր ԵՄ-ի և ՆԱՏՕ-ի երկրների, Ուկրաինայի և դաշնակից որոշ այլ երկրների համար, ինչպիսիք են Ճապոնիան, Ավստրալիան և Հարավային Կորեան, հայտնում է DW-ն։

Հաստատված արտահանման ավելի քան մեկ երրորդը` 4,15 միլիարդ եվրոն, ուղղված է Ուկրաինային օգնությանը: Այսպես կոչված երրորդ երկրների համար, ինչպիսիք են Իսրայելը, Արաբական Միացյալ Էմիրությունները կամ Սաուդյան Արաբիան, Գերմանիայի կառավարությունը հավանություն է տվել 1,76 միլիարդ եվրոյի զենքի և ռազմական տեխնիկայի արտահանմանը։