ԱՄՆ և Ուկրաինայի նախագահներ Ջո Բայդենի և Վլադիմիր Զելենսկու հանդիպումը կամ դրա արդյունքները որևէ կերպ չեն կարող փոխել հատուկ ռազմական գործողության ընթացքը, հայտարարել է ՌԴ նախագահի մամուլի խոսնակ Դմիտրի Պեսկովը։
«Ուկրաինային տրվող տասնյակ միլիարդավոր դոլարները չօգնեցին նրան հաջողություններ գրանցել մարտի դաշտում, նույն ֆիասկոն է սպասվում Ուկրաինային` նաև մյուս տասնյակ միլիարդավոր դոլարների դեպքում, որոնք ցանկանում է, որ ներմուծվեն իր երկիր։ Այս պրոցեսը մենք շատ լավ ենք հասկանում»,- ասել է Պեսկովը։
«Մարտի դաշտում իրավիճակը փոխել անհնար է, դա չի օգնի փոխել նաև հատուկ ռազմական գործողության ընթացքը»,- հավելել է ՌԴ նախագահի խոսնակը՝ մեկնաբանելով առաջիկայում կայանալիք Բայդեն-Զելենսկի հանդիպումը։ Դմիտրի Պեսկովը միևնույն ժամանակ նշել է, որ Կրեմլը ուշադիր հետևելու է ԱՄՆ և Ուկրաինայի նախագահների հանդիպմանը։
Նշենք, որ ավելի վաղ Վաշինգտոնը հայտարարել էր, որ ԱՄՆ նախագահ Ջո Բայդենը Ուկրաինայի նախագահին դեկտեմբերի 12-ին հրավիրել է Սպիտակ տուն՝ հանդիպման։ Զելենսկին ելույթ է ունենալու նաև Կոնգրեսում։
