Ռուսաստանն ու Գերմանիան շահեկան համագործակցություն էին զարգացնում ավելի քան 50 տարի, սակայն այն ընդհատվեց «Հյուսիսային հոսքի» վրա դիվերսիայի պատճառով։ Այս մասին ՌԴ-ում օտարերկրյա պետությունների նոր դեսպաններին հավատարմագրերի հանձնման արարողության ժամանակ հայտարարել է ՌԴ նախագահ Վլադիմիր Պուտինը, փոխանցում է ՏԱՍՍ-ը։
Երկրի ղեկավարի խոսքով՝ շփումները եղել են պրագմատիկ և գործնական, դրանք օգուտ են բերել ոչ միայն երկու երկրներին, այլև ողջ Եվրոպային։ Պուտինը նշել է, որ էներգետիկան միշտ եղել է երկկողմ համագործակցության գրավիչ ոլորտ։
ՌԴ նախագահն ընդգծել է, որ Ռուսաստանը տասնամյակներ շարունակ հուսալիորեն և առանց ընդհատումների Գերմանիային գազ, նավթ և այլ հումք է մատակարարել հասանելի և մատչելի գներով։
«Եվ այս համագործակցությունը բառացիորեն ընդհատվեց, այդ թվում՝ «Հյուսիսային հոսքի» վրա դիվերսիայի պատճառով», - եզրափակել է Պուտինը:
