Իսրայելը հայտնել է, որ ԱՄՆ ճնշումից հետո կթույլատրի, որ օրական Գազայի հատված մտնի վառելիքով բեռնված երկու բեռնատար, տեղեկացրել է ВВС-ն։
ԱՄՆ պետդեպարտամենտի ներկայացուցչի խոսքով՝ երկու օրը մեկ կթույլատրվի մոտ 140 հազար լիտր վառելիք հասցնել Գազայի հատված։
Այդ վառելիքի մեծ մասը նախատեսված է օգնություն հասցնող բեռնատարների, ինչպես նաեւ ՄԱԿ աջակցության համար՝ որպեսզի ապահովվեն ջրամատակարարումն ու սանիտարիան, ասել է պաշտոնյան։
Մնացած վառելիքը նախատեսված է բջջային կապի եւ ինտերնետի համար, որոնք անջատվել էին վառելիքի անբավարարության պատճառով։
Ուրբաթ Գազայում կապն ապահովող ընկերությունը տեղեկացրել է, որ իր ծառայությունները վերականգնվում են UNRWA-ի՝ ՄԱԿ պաղեստինցի փախստականների գործերի գործակալության միջոցով որոշակի քանակությամբ վառելիք ստանալուց հետո։
Վաշինգտոնը զգալի ճնշում է գործադրել Իսրայելի վրա, որպեսզի հասնի վառելիքի մատակարարման մասին համաձայնությանը, տեղեկացրել է ԱՄՆ ներկայացուցիչը։
Նա նշել է, որ պայմանավորվածությունը ձեռք է բերվել մի քանի շաբաթ առաջ, բայց Իսրայելը հետաձգում էր այն երկու պատճառով։ Իսրայելցի պաշտոնատար անձինք ԱՄՆ-ին տեղեկացրել էին, որ իրականում վառելիքը Գազայի հարավային մասում չի սպառվել, եւ նրանք ցանկանում էին նաեւ սպասել ու տեսնել, թե կկարողանան արդյոք սկզբում պայմանավորվել պատանդների հարցում։
