Գեղարքունիքի մարզային փրկարարական վարչության ճգնաժամային կառավարման կենտրոնը hուլիսի 15-ին, ժամը 21:02-ին տեղեկություն է ստացել, որ ժամը 19։00-ի սահմաններում Սևանա լճի տարածքում գտնվող հանգստյան գոտիներից մեկում քաղաքացին ջրային մոտոցիկլետով դուրս է եկել լիճ և չի կարողանում վերադառնալ ափ. անհրաժեշտ է փրկարարների օգնությունը։

Դեպքի վայր են մեկնել ՆԳՆ ՓԾ մարզային փրկարարական վարչության հատուկ ջրափրկարարական ջոկատի մեկ մարտական հաշվարկ և փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը:

Ջրափրկարարները Սևանա լճում մոտորանավակով իրականացրել են որոնողական աշխատանքներ. կիրառվել է նաև անօդաչու թռչող սարք:

Որոնողական աշխատանքներ են ծավալվել նաև Գավառ քաղաքի ափամերձ հատվածներում:

Ժամը 23։20-ին տեղեկություն է ստացվել, որ ՌԴ քաղաքացի Ն. Չ.-ն հայտնաբերվել է «Նոյ Լենդ Ռեզորթ» հանգստյան գոտու մոտակայքում՝ լճում (ափից մոտ 400 մ հեռավորության վրա)։

Նշվում է, որ պարզվել է, որ ջրային մոտոցիկլետի վառելիքը վերջացել է, և քաղաքացին չի կարողացել վերադառնալ ափ։

Քաղաքացին տեղի ուժերով դուրս է բերվել Նորաշեն գյուղի ափամերձ հատված։