Shamshyan.com-ը գրում է․ Այսօր՝ հունիսի 5-ին, արտակարգ դեպք է տեղի ունեցել Երևանում։

Ժամը 07։20-ի սահմաններում ՀՀ Ներքին գործերի նախարարության Փրկարար ծառայության 911 Ճգնաժամային կառավարման ազգային կենտրոն ահազանգ է ստացվել, որ Ներքին Շենգավիթի տներից մեկում քաղաքացին ինքնավնասում է արել, վնասելով ձեռքի երակը։

Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել են ՀՀ ՆԳՆ ՓԾ Երևանի թիվ 2-րդ հրշեջ-փրարարական ջոկատից 1 մարտական հաշվարկ։ 

Տեղում հրշեջ-փրկարարները, այնուհետև նրանց միացած փրկարար հոգեբանը պարզել են, որ տան սենյակներից մեկում երիտասարդ տղան կտրել է երակը և սպառնում է նորից դիմել այդ միջոցի։

Փրկարար հոգեբանը տեղում ցուցաբերել է հոգեբանական աջակցություն, որից հետո ժամանել են ՀՀ ՆԳՆ Ոստիկանության Պարեկային ծառայության Երևան քաղաքի գնդի 2-րդ գումարտակի պարեկները՝ գումարտակի հրամանատարի տեղակալ Դավիթ Նիկողոսյանի գլխավորությամբ, ապա այդ քաղաքացուն, իր ցանկությամբ՝ տեղափոխել են Ոստիկանության Շենգավիթի բաժին։ 

Գ․ Շամշյանի տեղեկություններով՝ նա 31-ամյա Է․ Բ․-ն է, և այսօր դատարանում նրա վերաբերյալ պետք է ընթանար հերթական դատական նիստը։