Ֆրանսիայի նախագահ Էմանուել Մակրոնը չորեքշաբթի օրը Սլովակիայի մայրաքաղաքում անվտանգության կոնֆերանսի ժամանակ ասել է, որ իր ռուսաստանցի գործընկեր Վլադիմիր Պուտինն արթնացրեց ՆԱՏՕ-ին՝ անցյալ տարի ներխուժելով Ուկրաինա: Այս մասին գրել է France24-ը։
Մակրոնը նաև կոչ է արել Արևմուտքին առաջարկել Ուկրաինային անվտանգության «շոշափելի և վստահելի» երաշխիքներ, քանի որ «երկիրը պայքարում է ռուսական ներխուժման դեմ»:
«Ես կոշտ խոսք ասացի ՆԱՏՕ-ի հասցեին 2019-ի դեկտեմբերին», - ասել է Մակրոնը GLOBSEC Բրատիսլավայի գլոբալ անվտանգության ֆորումի ժամանակ՝ հիշելով, թե ինչպես էր այդ ժամանակ արևմտյան պաշտպանական դաշինքին անվանել «ուղեղով մահացած»:
«Կարող եմ ասել, որ այսօր Վլադիմիր Պուտինը նրան արթնացրեց ամենաուժեղ էլեկտրաշոկով», - ավելացրել է նա:
Ընդգծելով, թե Ուկրաինան «այսօր պաշտպանում է Եվրոպան»՝ Մակրոնն ասել է, որ Արևմուտքի շահերից է բխում, որ Կիևը անվտանգության երաշխիքներ ստանա ՆԱՏՕ-ից։
«Դա է պատճառը, որ ես կողմ եմ, և սա կլինի հավաքական բանակցությունների թեմա հաջորդ շաբաթների ընթացքում [...] առաջարկել Ուկրաինային անվտանգության շոշափելի և վստահելի երաշխիքներ», - հավելել է նա:
Նա ասել է, որ ՆԱՏՕ-ի տարբեր անդամներ առայժմ կարող են այդ երաշխիքները տրամադրել, քանի որ Ուկրաինան սպասում է դաշինքին միանալուն:
