Թուրքիան հրաժարվել է ավերիչ երկրաշարժից հետո ընդունել Կիպրոսի առաջարկած օգնությունը։ Այս մասին ասված է Կիպրոսի Հանրապետության արտաքին գործերի նախարարության կայքում հրապարակված հաղորդագրության մեջ։
«Ի սկզբանե Կիպրոսի Հանրապետությունը Քաղաքացիական պաշտպանության եվրոպական մեխանիզմի միջոցով տրամադրել է փրկարարական թիմ՝ օգնելու համար: Այս առաջարկը մերժվել է»,- ասվում է հաղորդագրության մեջ։
Կիպրոսի ԱԳՆ-ն պարզաբանել է նաև, որ իրենք կապ են հաստատել աղետի գոտում գտնվող երկրի քաղաքացիների հետ և պարզել, որ նրանք բոլորն ապահով վայրերում են։
Հիշեցնենք, որ Հայաստանի Հանրապետությունը փրկարարական ջոկատներ է ուղարկել Սիրիա և Թուրքիա՝ աջակցելու երկրաշարժի հետևանքով տուժած շրջաններում իրականացվող որոնողափրկարարական աշխատանքներին:
Թուրքիա ուղարկվել է 27, իսկ Սիրիա` 29 փրկարար։ Նշենք, որ փրկարարական ջոկատները արդեն վայրէջք են կատարել, մեկնող փրկարարական ջոկատների ծառայողներին ճանապարհել են ՀՀ ներքին գործերի նախարար Վահե Ղազարյանն ու փրկարար ծառայության տնօրեն-ՆԳ նախարարի տեղակալ Կամո Ցուցուլյանը:
