Միացյալ Նահանգները պատասխան է ստացել Ռուսաստանից՝ ավելի վաղ Վաշինգտոնի կողմից Մոսկվա ուղարկված առաջարկներին՝ կապված Ուկրաինայի շուրջ անվտանգության և լարվածության թուլացման հետ:
Այս մասին հաղորդում Է regionpress.am-ը։
Այս մասին երկուշաբթի օրը հայտնել է ԱՄՆ Պետդեպարտամենտի պաշտոնական ներկայացուցիչը, հաղորդում է ՏԱՍՍ-ը։ «Մենք կարող ենք հաստատել, որ գրավոր պատասխան ենք ստացել Ռուսաստանից»,- ասել է նա։
Միևնույն ժամանակ, ամերիկյան ԱԳՆ ներկայացուցիչը հրաժարվել է որևէ մանրամասներ հայտնել և բացահայտել փաստաթղթի բովանդակությունը։
«Հրապարակում բանակցություններ վարելը արդյունավետ չի լինի, ուստի մենք Ռուսաստանին հնարավորություն կտանք քննարկելու իրենց պատասխանը, եթե նրանք ցանկանան: Մենք լիովին հավատարիմ ենք մնում երկխոսությանը այս խնդիրների լուծման համար և կշարունակենք սերտորեն աշխատել մեր դաշնակիցների և գործընկերների հետ, ներառյալ Ուկրաինայի»,- ասել է պաշտոնյան։
Հիշեցնենք, անցյալ տարվա դեկտեմբերի 17-ին ՌԴ ԱԳՆ-ն հրապարակել էր անվտանգության երաշխիքների վերաբերյալ ռուսական համաձայնագրերի նախագծերը, որոնք Մոսկվան ակնկալում է Վաշինգտոնից և ՆԱՏՕ-ից։ ԱՄՆ-ը և ՆԱՏՕ-ն հունվարի 26-ին Ռուսաստանին են փոխանցել անվտանգության երաշխիքների վերաբերյալ առաջարկների գրավոր պատասխանները։ Ամերիկյան կողմը խնդրել է, որ այդ փաստաթղթերի տեքստերը չհրապարակվեն, սակայն ԱՄՆ պետքարտուղար Էնթոնի Բլինկենը և ՆԱՏՕ-ի գլխավոր քարտուղար Յենս Ստոլտենբերգը թվարկել են դրանց հիմնական դրույթները։
Ըստ այդ հայտարարությունների՝ Արևմուտքը ոչ թե սկզբունքային զիջումների գնաց Ռուսաստանի համար, այլ նախանշել է հետագա բանակցությունների ուղղությունները։ Երկուշաբթի օրը ամերիկյան կողմը Ռուսաստանից ստացել է Մոսկվայի պատասխանը Վաշինգտոնի այս առաջարկներին։
Հիշեցնենք, վերջերս արևմտյան երկրներում, ինչպես նաև Կիևում հայտարարություններ են հնչում Ուկրաինայի տարածք ռուսական ուժերի հնարավոր ներխուժման մասին։ Ռուսաստանի նախագահի մամուլի քարտուղար Դմիտրի Պեսկովը նման տեղեկություններն անվանել էր դատարկ և անհիմն լարվածության սրացում։
