Ռուսաստանի նախագահ Վլադիմիր Պուտինը եւ Մեծ Բրիտանիայի վարչապետ Բորիս Ջոնսոնը քննարկել են Ուկրաինայի շուրջ վերջին զարգացումները։

Կրեմլի մամուլի ծառայության հաղորդմամբ, ինչպես եւ արեւմտյան մյուս առաջնորդները, Բորիս Ջոնսոնը մտահոգություն է հայտնել ուկրաինական սահմանների մոտ ռուսական զորքերի ենթադրյալ լայնածավալ տեղաշարժերի կապակցությամբ։ Այդ առումով Վլադիմիր Պուտինը մանրամասն ներկայացրել է Ուկրաինայի շուրջ ստեղծված իրավիճակի վերաբերյալ իր սկզբունքային գնահատականները։

«Բերված են Կիեւի ապակառուցողական գծի կոնկրետ օրինակներ՝ Մինսկի պայմանավորվածությունների խաթարման վերաբերյալ, որոնք անվիճելի հիմք են ներուկրաինական ճգնաժամի կարգավորման համար։ Նշվել է նաեւ, որ ուկրաինական իշխանությունները նպատակաուղղված սրում են իրավիճակը շփման գծում, օգտագործում են ծանր զինատեսակներ եւ հարձակվում են անօդաչու թռչող սարքերի վրա, որոնք արգելված են Մինսկի «Միջոցառումների համակարգ»-ով։ Ուշադրություն է հրավիրվել նաեւ Ուկրաինայի կողմից ռուսալեզու բնակչության նկատմամբ խտրականության քաղաքականությանը։

Ընդգծվել է, որ այս ամենը տեղի է ունենում ՆԱՏՕ-ի երկրների կողմից Ուկրաինայի տարածքի ակտիվ ռազմական «յուրացման» ֆոնին, որն ուղղակի վտանգ է ներկայացնում Ռուսաստանի անվտանգության համար։

Սա հաշվի առնելով՝ Վլադիմիր Պուտինը հայտարարել է անհապաղ բանակցություններ սկսելու անհրաժեշտության մասին՝ հստակ միջազգային իրավական համաձայնագրեր մշակելու համար, որոնք կբացառեն ՆԱՏՕ-ի ցանկացած հետագա առաջխաղացում դեպի արեւելք եւ Ռուսաստանին սպառնացող զենքի տեղակայում սահմանակից երկրներում, առաջին հերթին՝ Ուկրաինայում: Ռուսական կողմը կներկայացնի համապատասխան փաստաթղթերի նախագծեր։

Ղեկավարները պայմանավորվել են շարունակել բարձրացված հարցերի քննարկումը տարբեր խողովակներով»,- ասվում է հաղորդագրության մեջ։