Անտառային հրդեհները դարձել են միջազգային սպառնալիք՝ համեմատելի կորոնավիրուսային համաճարակի և ահաբեկչության հետ, ասել է Թուրքիայի նախագահ Ռեջեփ Թայիփ Էրդողանը: Այդ մասին նա հայտնել է A Haber հեռուստաալիքին տված հարցազրույցում: Էրդողանի խոսքով՝ ամբողջ աշխարհը կանգնած է անտառային հրդեհների վտանգի առաջ. անտառներ են այրվում ԱՄՆ -ում, Կանադայում, Ռուսաստանում, Իսպանիայում, Իտալիայում, աֆրիկյան երկրներում, եւ այս իրավիճակը պայմանավորված է կլիմայական պայմաններով: Էրդողանը հավելել է, որ վերջին 8 օրվա ընթացքում Թուրքիայում բռնկվել է 187 անտառային հրդեհ, որոնց մեծ մասը տեղայնացվել է: 15 հրդեհ դեռ չի հաջողվել հանգցնել: 20 ինքնաթիռ և 51 ուղղաթիռ ներգրավված են հրդեհաշիջման աշխատանքների մեջ: Ինչպես ավելի վաղ հայտնել էինք, անտառային հրդեհները հասել են Թուրքիայի հարավ-արեւմուտքում գտնվող Մուղլա շրջանի ջերմաէլեկտրակայան: «Կրակը տարածվել է դեպի ՋԷԿ: Բոլորը տարհանվում են կայանից, հնչում են տագնապի ազդանշաններ»,- նշվում է Մուղլա շրջանի Միլասի քաղաքապետարանի տարածած հայտարարության մեջ: https://www.youtube.com/watch?v=NbO4JRnXhaA