Այսօր կառավարության նիստում քննարկվել և ընդունվել է վիրավոր զինվորների համար էկզոսկելետոն աջակցող միջոցի ձեռքբերման նախագիծը։ Ուշագրավն այն է, որ մասնագիտությամբ իրավաբան, բայց Առողջապահության նախարարի աթոռին նստած Անահիտ Ավանեսյանը դեմ է արտահայտվել նախագծին։ Այն գործադիրի հաստատմանն էր ներկայացրել Աշխատանքի և սոցիալական հարցերի նախարարությունը։ Կառավարության նիստում քննարկման ընթացքում միակ դեմ արտահայտվողը եղել է Առողջապահության նախարարությունը, սակայն կառավորությունը չի ընդունել առողջապահության նախարարության դիտարկումը և վիրավոր զինվորները կունենան լավագույն էկզոսկիլետոնը։ Ի դեպ, միջազգային փորձի ուսումնասիրությունը ցույց է տալիս, որ հենաշարժական խնդիրներ ունեցող անձանց վերականգնողական միջամտություն տրամադրելիս էկզոսկելետոնների անհրաժեշտությունը շատ մեծ է և բավականին լավ արդյունք են ապահովում անձի շարժունակության վերականգնման գործընթացում: Այդ սարքը նյարդաբանական և նեյրոդեգեներատիվ հիվանդություններից հետո ստորին վերջույթների մարզման համար նախատեսված թերապևտիկ սարք է, որը շարժունակության խանգարումներ ունեցող անձանց հնարավորություն է տալիս ինքնուրույն քայլել։ Հարմարեցվող է, նախատեսված է ինչպես կլինիկական այնպես էլ անհատական օգտագործման համար: Իսկ օրինակ առողջապահության նախարարության հիմնավորումը  հետևյալն է․ «Առողջապահության նախարարությունը գտնում է, որ էկզոսկելետոն աջակցող միջոցի կիրառումը վերականգնողական բժշկական օգնության և սպասարկման իրականացման ժամանակ անարդյունավետ է, հետևաբար նպատակահարմար չէ վերջինիս ձեռքբերումը»։ Անահիտ Ավանեսյանի ղեկավարած կառույցից իհարկե  չեն մանրամասնել, թե ինչ ասել է «անարդյունավետ», եթե հաշվի առնենք, որ համաշխարհային բժշկության մեջ այն կիրառվող մեթոդ է։ Չնայած զարմանալի չէ, ի վերջո Ավանեսյանը բժշկության հետ աղերս չունի։ Հակառակ դեպքում զինվորների աճյուններն ու մասունքներն անմխիթար վիճակում չէր պահի, կամ գոնե այդ խայտառակությունից հետո տիկին նախարարը հրաժարական կներկայացներ։ Irakanum.am