Այս դահլիճում մենք վիրտուալ իրականությունից պետք է վերադառնանք ռեալ կյանք և քննարկենք, օրինակ, թե ինչպես եղավ, որ մեր հերոս տղաների դիակները կարտոֆիլի նման պարկերով լցված էին և տեղափոխվում էին դիահերձարանից դիահերձարան, ԱԺ արտահերթ նիստին ամբիոնից հայտարարեց պատգամավոր Նաիրա Զոհրաբյանը։ «Ես եղել եմ Կոտայքի դիահերձարանում և տեսել եմ այդ զարհուրելի տեսարանը։ Ինչպե՞ս եղավ, որ պատասախանատվության է ենթարկվում ընդամենը սանիտարը և բաժնի պետը, որն, ըստ էության, մեղավոր չէ, որովհետև Կոտայքի դիահերձարանում ընդամենը 10 դիակի տեղ կա։ Հայտարարում են, թե կարող են լինել նաև ադրբեջանցիների դիեր. կարո՞ղ է մի օր էլ հայտարարեք, թե ծնողներից մեկին տվել եք ադրբեջանցու դիակ, հիմա նա ամեն օր խնկարկում է դրա առաջ», - ասաց պատգամավորը։ Զոհրաբյանի խոսքով՝ խորհրդարանում այդ հարցերը պետք է քննարկվեին արտահերթ նիստով, ոչ թե, օրինակ «Ավտոմոբիլային տրանսպորտի մասին» օրենքում փոփոխությունն է քննարկվում։ Ավելի վաղ Mediaport տելեգրամյան ալիքը հայտնել էր, որ «Աբովյանի տուբերկուլյոզի հիվանդանոցի դիահերձարանի հատակին այս պահին հարյուրավոր զինվորների մարմիններ են պահվում՝ պոլիէթիլենային տոպրակների մեջ փաթաթած»։