«Անմիջական օգնություն հակամարտությունից տուժած անձանց համար» ծրագրի շրջանակներում Լեռնային Ղարաբաղի հակամարտության պատճառով ժամանակավորապես ՀՀ տեղափոխված հազար շահառու ընտանիք (մոտ 4.000 անձ) ստացել է պարենային և ոչ պարենային ապրանքների տեսքով մեկանգամյա աջակցություն։ Ծրագիրն իրականացրել է «Հայկական Կարիտաս» բարեսիրական հասարակական կազմակերպությունը Շիրակի, Լոռու և Գեղարքունիքի մարզերում:
«Տրամադրվող աջակցության շնորհիվ հնարավոր կլինի թեթևացնել ինչպես նաև այն հյուրընկալ ընտանիքների ծախսերը, ովքեր հակամարտության առաջին օրվանից աջակցում են տեղահանված անձանց։ Հաշվի առնելով կորոնավիրուսային հիվանդության ռիսկերը՝ «Հայկական Կարիտասը» նվազեցրել է հաղորդակցումը ծրագրի շահառուների հետ՝ համատեղելով գրանցման և փաթեթների բաշխման գործընթացը»,- «Արմենպրես»-ի հետ ունեցած զրույցի ժամանակ նշեց ծրագրի պատասխանատու Քրիստինե Մխիթարյանը:
Ծրագիրն իրականացվել է Միջազգային Կարիտասի աջակցությամբ (ֆինանսական ներդրում կատարել են՝ Կարիտաս Ավստրիան, Կարիտաս Գերմանիան, Կարիտաս Իսպանիան, Քորդեիդը, Կարիտաս Դանիան, Կարիտաս Լեհաստանը, Կարիտաս Ճապոնիան, Կարիտաս Չեխիան, ինչպես նաև «Կաթոլիկ օգնության ծառայություններ»-ը՝ որպես ծրագրի իրականացմանն աջակցող գործընկեր):
00:00:00
