«Ժողովուրդ» թերթը գրում է. ««Ժողովուրդ» օրաթերթը պարզել է, որ Հայաստանում հասարակական զուգարանների հարցը շարունակում է օրախնդիր մնալ: Զբոսաշրջության խթանումը կարևորող մեր երկրում ճանապարհներին զուգարաններ չկան, հույսը մնում են գազալցակայանները, որոնցում էլ զուգարանների սանիտարահիգիենիկ վիճակն ուղղակի անմխիթար է: «Ժողովուրդ» օրաթերթը տեղեկացել է, որ այժմ էլ Տարածքային կառավարման և ենթակառուցվածքների նախարարությունը հանձնարարել է մարզպետարաններին, որ կրկին ուսումնասիրվեն մարզի տարածքում գտնվող հասարակական զուգարանները: Լոռու մարզպետարանի հողաշինության և հողօգտագործման բաժնի պետի ժամանակավոր պաշտոնակատար Էդգար Հախվերդյանը «Ժողովուրդ» օրաթերթին փոխանցել է, թե մարզում կան մի քանի գազալցակայան, որոնք դեռևս չեն բավարարում պահանջվող չափանիշներին: Իսկ ԱՆ Տեսչական մարմնի սանիտարահիգիենիկ և հակահամաճարակային վերահսկողության վարչության պետ Աննա Հարությունյանը ասել է. «Մենք մեծ թվով գազալցակայաններում սկսեցինք ստուգումներ անել, վարչական վարույթներ հարուցել»: Տուգանվածների թիվը, ըստ նրա, 300-ից ավելի է»: Առավել մանրամասն՝ թերթի այսօրվա համարում: