Ինչպես հայտնել ենք, ԱԺ փոխնախագահ Լենա Նազարյանը երեկ հանդիպել է Եվրախորհրդի Քաղաքական դասընթացների երեւանյան դպրոցի՝ Եվրամիության աջակցությամբ կազմակերպված «Ժողովրդավարական քաղաքացիության ուսուցում. առաջին անգամ ընտրող» իրազեկման ծրագրում ներգրավված Հայաստանի մարզերի աշակերտների, ծրագրի ղեկավարների հետ: Անդրադառնալով ուսանողների ուսման վարձերի խնդրին՝ ԱԺ փոխխոսնակ Լենա Նազարյանը տեղեկացրել է, որ «Իմ քայլը» խմբակցության կողմից առաջիկայում խորհրդարան կներկայացվի մի նախաձեռնություն, ըստ որի՝ աշխատող ուսանողի աշխատավարձի եկամտահարկը կուղղվի ուսման վարձի վճարմանը: Հիշեցնենք՝ եկամտահարկի գործող դրույքաչափերը հետևյալն են՝ մինչև 150 000 դրամ աշխատավարձի դեպքում հարկվում է 23 % , 150 000 - 2 մլն դրամի դեպքում՝ 28 տոկոս, 2 մլն դրամից ավելիի դեպքում՝ 36 %: Այսինքն՝ 150 000 դրամ աշխատավարձ գրանցված աշպատավարձի դեպքում դեպքում, այսպես ասած, մաքուր աշխատավարձը կկազմի 110750 դրամ: Եկամտային հարկը կկազմի 34 500 դրամ, սոցիալական վճարը` 3 750 դրամ, պետության կողմից կուտակային հաշվին հավելյալ կփոխանցվի 11 250 դրամ: Կուտակային հաշվի ամսական համալրումը կկազմի 1 5000 դրամ: Զինծառայողների Ապահովագրության Հիմնադրամի դրոշմանիշային վճարը 1000 դրամ է։ Ստացվում է՝ 150 000 գրանսված աշխատավարձ ստացողը 34 500 դրամ եկամտահարկ է վճարում, իսկ 100 000 ստացողը՝ 23 000 դրամ։ Գաղտնիք չէ՝ գործատուները, սովորաբար, ուսանողներին չեն գրանցում որպես աշխատող, բացի այդ՝ աշխատող ուսանողները հաճախ չեն էլ ցանկանում գրանցված աշխատող լինել, քանի որ մտածում են՝ պահումները շատ են, ուստի շատերը նախընտրում են չգրանցված աշխատող լինել ու ստանալ ավելի շատ աշխատավարձ, թեև դա անօրինական է։ Բազմաթիվ ուսանողներ և՛ սովորում են, և՛ աշխատում, և սխալված չենք լինի, եթե ասենք՝ աշխատող ուսանողների՝ եթե ոչ մեծ մասը, ապա մի ստվար մասը չգրանցված աշխատող է, հետևաբար եթե անգամ առաջիկայում Լենա Նազարյանի նշած նախագիծն ընդունվի և աշխատող ուսանողի աշխատավարձի եկամտահարկն ուղղվի ուսման վարձի վճարմանը, բազմաթիվ աշխատող ուսանողների համար ոչինչ չի փոխվի, քանի որ նրանք, մեկ է, գրանցված աշխատող չեն։ Մեր այս մտահոգությունը, հավանաբար, շատերը կկիսեն։ Այս թեմայի վերաբերյալ զրուցեցինք աշխատող ուսանողների և ուսումնառությունն ավարտած քաղաքացու հետ, որը ևս անդրադարձավ այն խնդրին, որ, մեր երկրում սովորաբար, ուսանողները չգրանցված աշխատողներ են։ «Ես ուսումս նախորդ տարի եմ ավարտել։ Սովորել եմ Կոմիտասի անվան կոնսերվատորիայում։ Իմ ուսման վարձը կազմում էր 800 000 դրամ։ Իհարկե, ուսումնառության ընթացքում լավ սովորեցի և ուսմանս վարձը 50 տոկոսով զեղչվեց, բայց 400 000 դրամը դարձյալ քիչ չէր, ու թեև աշխատել եմ ուսանողական տարիներին, բայց ընթացիկ ծախսերը շատ էին, և ես իմ վարձի մի փոքր մասն էի կարողանում վճարել, մնացածը վճարում էին ծնողներս։ Իհարկե, լավ կլինի, եթե աշխատող ուսանողի աշխատավարձի եկամտահարկն ուղղվի ուսման վարձի վճարմանը, բայց, եկե՛ք անկեղծ լինենք․ աշխատող ուսանողների հիմնական մասը չգրանցված է, գործատուներից շատերը չեն գրանցում աշխատող ուսանողներին։ Ինքս էլ ուսամնառության տարիներին որքան աշխատել եմ, չգրանցված աշխատող եմ եղել․ ընտրության այլ հնարավորություն պարզապես չկար։ Հուսանք, որ եթե այդպիսի օրենք ընդունվի, ապա ուսանողներն էլ շահագրգռված կլինեն աշխատել այնպիսի վայրերում, որտեղ իրենց կգրանցեն», - irakanum.am-ի հետ զրույցում նշեց Կոնսերվատորիայի շրջանավարտ Հռիփսիմեն։ Արագածոտնի մարզի Ոսկեվազ համայնքի մակնապարտեզում աշխատող Ամալյա Զոհրաբյանն էլ մեր թղթակցի հետ զրույցում նշեց՝ այժմ և՛ սովորում է, և՛ աշխատում և իրեն շատ է ուրախացրել այն, որ հնարավոր է՝ առաջիկայում աշխատող ուսանողի աշխատավարձի եկամտահարկն ուղղվի ուսման վարձի վճարմանը: «Այժմ սովորում եմ Խաչատուր Աբովյանի անվան հայկական պետական մանկավարժական համալսարանում և, իհարկե, աշխատում եմ։ Եթե վերոնշյալ նախագիծը կյանքի կոչվի, կարծում եմ, այն բազմաթիվ աշխատող ուսանողների բեռը կթեթևանա, քանի որ աշխատավարձի 23 տոկոսն, ըստ էության, քիչ գումար չէ, և ուրախալի է, որ այն կարող է փոխանցվել որպես ուսման վարձ», - նշեց Ամալյա Զոհրաբյանը։ Մեր զրուցակիցներից մեկն էլ չցանկացավ անուն, ազգանուն նշել։ Նա նշեց՝ չգրանցված աշխատող է, աշխատում է խանութում։ «Ես չեմ ցանկանա աշխատանքս կորցնել, ուստի չեմ ուզենա նշել, թե որտեղ եմ աշխատում, բայց պետք է արձանագրենք՝ աշխատող ուսանողների իրավունքները միշտ խախտվում են։ Մեզ խուսափում են գրանցել, ախատավարձը մյուսների համեմատությամբ ավելի քիչ են տալիս, բայցի այդ՝ պահումներն էլ շատ են, այնպես որ՝ ես կարծում եմ՝ առաջնահերթ պետք է լուծել այս խնդիրները, ապա ուշադրություն դարձնել Ձեր նշած հարցին։ Պատկան մարմինները փորձե՞լ են պարզել, թե աշխատող ուսանողների քանի տոկոսն է գրանցված, թե ինչպես են խախտվում նրանց իրավունքները», - նշեց մեր զրուցակիցը