«Հյուսիս-Հարավ» ավտոճանապարհի կառուցման սկզբից՝ 2012-ի սեպտեմբերից մինչև 2017թ. օգոստոսի 1-ն ընկած ժամանակահատվածում ծախսվել է շուրջ 150.3 մլն ԱՄՆ դոլար և 23,14 մլն եվրո գումար, կառուցապատվել՝  31 կմ ճանապարհ: Այս մասին Tert.am-ին հայտնել էին Տրանսպորտի, կապի և տեղեկատվական տեխնոլոգիաների նախարարությունից նախորդ տարվա օգոստոսին: Այս տարի, Tert.am-ի հարցմանը, թե «Հյուսիս-Հարավ» ավտոճանապարհի կառուցման սկզբից մինչև 2018 թվականի հունիսի 28-ը որքան ճանապարհ է կառուցվել, մեկ տարի անց Տրանսպորտի, կապի և տեղեկատվական տեխնոլոգիաների նախարարությունից հայտնել են՝ 31 կմ ճանապարհ, բայց 28 կմ ճանապարհ բետոնապատվել է,   կատարվել են հողային աշխատանքներ: Ճանապարհի կառուցման համար էլ 3 բանկի հետ ստորագրվել է 480 մլն դոլարի և 60 մլն եվրոյի համաձայնագիր: Ճանապարհի ավարտի ժամկետ նախարարությունը չի նշում, անհրաժեշտ գումարի չափ ևս: Ճանապարհի կառուցման համար անհրաժեշտ միջոցները կարող են հստակեցվել դեռևս չվերակառուցվող ճանապարհահատվածների նախագծանախահաշվային փաստաթղթերը պատվիրելուց և դրա արդյունքներն ունենալուց հետո: Հարցին, թե 2018 թվականի հունվարի 1-ից մինչև հունիսի ավարտը որքան ճանապարհ է կառուցվել, նախարարությունից հայտնել են, որ 2018 թվականի հունվարի 1-ից մինչև հունիսի ավարտը «Տրանշ 2»-ի շրջանակում իրականացվող Մ1 Աշտարակ-Թալին ավտոճանապարհի կմ 29+600-ից մինչև կմ 71+500 (շուրջ 42 կմ) վերակառուցման և բարելավման աշխատանքների մասով իրականացվել են շուրջ 6,8 կմ ճանապարհի վերակառուցման աշխատանքներ: «Տրանշ 3»-ի շրջանակում վերակառուցվող Թալին-Լանջիկ (18,7 կմ) հատվածում առաջընթացը կազմում է 22%, իսկ Լանջիկ-Գյումրի հատվածում (27,5 կմ)` 16%: Նախարարությունից հայտնել են, որ 2018-ի հունիսի 28-ի դրությամբ «Հյուսիս-Հարավ» մայրուղու ընդհանուր երկարության քանի կմ ճանապարհ է կառուցվել, ՏԿՏՏ նախարարությունից հայտնել են, որ  «Հյուսիս-հարավ» մայրուղու շինարարության համար ներգրավված վարկային միջոցները նախատեսված են Երևան-Արտաշատ, Երևան-Աշտարակ շուրջ 31 կմ («Տրանշ 1»), Աշտարակ-Թալին` շուրջ 42 կմ («Տրանշ 2»), Թալին-Լանջիկ՝ շուրջ 18,7 կմ և Լանջիկ-Գյումրի՝ շուրջ 27,5 կմ («Տրանշ 3») ճանապարհի վերակառուցման համար: Նշված ծրագրերից «Տրանշ »-ի ներքո  վերակառուցված 31 կմ ընդհանուր երկարությամբ ճանապարհահատվածը հանձնված է շահագործման,  «Տրանշ 2»-ի շրջանակներում հարցվող ժամկետի դրությամբ իրականացված  է՝ շուրջ 28 կմ բետոնյա պատվածք (ընդհանուր պատվածքի շուրջ 30%-ը), արհեստական կառույցների շուրջ 80%  և հողային աշխատանքների շուրջ 60%։ «Տրանշ 3»-ում` նշված դրությամբ իրականացված են մոտ 30% հողային աշխատանքներ և արհեստական կառույցների մոտ 20%-ը: Թե երբ է նախատեսվում ավարտել ճանապարհի կառուցումը, նախարարությունը դեռ չգիտի, որովհետև դեռևս կնքված չեն ճանապարհի  մյուս հատվածները վերակառուցելու վարկային համաձայնագրերը. «Մայրուղու կառուցման վերջնաժամկետը հնարավոր է հստակեցնել միայն ֆինանսավորման հարցը ճշգրտելուց հետո»,-ասվում է նախարարության պատասխանում: Հարցին, թե  Ճանապարհի կառուցման համար որ բանկից որքան վարկ է վերցվել մինչ այժմ, նախարարությունից հայտնել են, որ ճանապարհի կառուցման համար մինչ օրս վարկային համաձայնագրեր են կնքվել Ասիական Զարգացման Բանկի, Եվրասիական Զարգացման Բանկի և Եվրոպական Ներդրումային Բանկի հետ: Կնքվել է շուրջ 480 մլն դոլարի և 60 մլն եվրոյի համաձայնագիր: • Ասիական Զարգացման Բանկ 1. Հյուսիս-հարավ տրանսպորտային միջանցքի զարգացման ծրագիր - «Տրանշ 1», ·    Վարկը` 60.0 մլն ԱՄՆ դոլար, ·    Ծրագրի նպատակը՝ Երևան-Աշտարակ և Երևան-Արտաշատ շուրջ 31 կմ ընդհանուր երկարությամբ ճանապարհահատվածների վերակառուցում և բարելավում: 2.      Հյուսիս-հարավ տրանսպորտային միջանցքի զարգացման ծրագիր - «Տրանշ 2» ·    Վարկը՝ 170.0 մլն ԱՄՆ դոլար, ·    Ծրագրի նպատակը՝ Աշտարակ-Թալին շուրջ 42 կմ ընդհանուր երկարությամբ ճանապարհահատվածի կառուցում և բարելավում: 3.    Հյուսիս-հարավ տրանսպորտային միջանցքի զարգացման ծրագիր` «Տրանշ 3» ·    Վարկը` 100 մլն ԱՄՆ դոլար, ·    Ծրագրի նպատակը՝ Թալին-Լանջիկ՝ շուրջ 18,7 կմ ճանապարհահատվածի վերակառուցում։ • Եվրոպական Ներդրումային Բանկ 4.      Հյուսիս-հարավ տրանսպորտային միջանցքի զարգացման ծրագիր` «Տրանշ 3» ·    Վարկը՝ 60.0 մլն եվրո, ·    Ծրագրի նպատակը՝ Լանջիկ-Գյումրի շուրջ 27,5 կմ ընդհանուր երկարությամբ ճանապարհահատվածի 90+200 կմ-ից մինչև 117+670 կմ (Լանջիկ-Գյումրի հատված) վերակառուցման աշխատանքների իրականացում: • Եվրասիական Զարգացման Բանկ 5.      Հյուսիս-հարավ տրանսպորտային միջանցքի զարգացման ծրագիր («Տրանշ 4», Քաջարան-Ագարակ ենթահատված) ·    Վարկը՝ 150.0 մլն ԱՄՆ դոլար, ·    Ծրագրի նպատակը՝ Քաջարան-Ագարակ շուրջ 32.0 կմ ընդհանուր երկարությամբ ճանապարհահատվածի կառուցում: Հիշեցնենք, որ «Հյուսիս-հարավ ճանապարհային միջանցքի ներդրումային ծրագիրը» խոշոր ենթակառուցվածքային ծրագիր է, որի նպատակն է միջազգային բարձր ստանդարտներին բավարարող 556 կմ ընդհանուր երկարությամբ Մեղրի-Երևան-Բավրա ավտոճանապարհի միջոցով երկրի հարավը կապել հյուսիսի հետ: