Ռուսաստանում ընթացող Ֆուտբոլի աշխարհի առաջնության մեծագույն անակնկալը գրանցվեց նախօրեին։ Գործող չեմպիոն Գերմանիայի հավաքականը դուրս մնաց պայքարից՝ խմբում վերջին տեղը զբաղեցնելով։ F խմբի փուլային վերջին տուրում Գերմանիան 0։2 հաշվով պարտվեց Հարավային Կորեային ու դուրս մնաց հետագա պայքարից։ Հարավկորեացիները 2 գնդալ խփեցին հանդիպման ավելացված ժամանակում։ Խմբի մյուս հանդիպմանը Շվեդիան 3։0 հաշվով հաղթեց Մեքսիկային։ Արդյունքում 1/8-րդ եզրափակիչ այս խմբից անցան Շվեդիան եւ Մեքսիկան՝ 6-ական միավորով։ E խմբում նախօրեին տեղի ունեցան հետեւյալ հանդիպումները՝ Սերբիա-Բրազիլիա եւ Շվեյցարիա-Կոստա Ռիկա։ Առաջին խաղում բրազիլացիները 2։0 հաշվով հաղթանակ տարան, Շվեյցարիա-Կոստա Ռիկա հանդիպումն էլ ավարտվեց ոչ ոքի՝ 2։2 հաշվով։ Արդյունքում Բրազիլիայի հավաքականը 7 միավորով եւ Շվեյցարիան 5 միավորով անցան 1/8-րդ եզրափակիչ։ Հիշեցնենք, որ ավելի վաղ՝ հունիսի 26-ին, Արգենտինայի հավաքականը «պոկեց» հաղթանակը Նիգերիայի հավաքականից 2։1 հաշվով՝ մի կերպ «սողոսկելով» 1/8-րդ եզրափակիչ։ Այսօր տեղի կունենան Առաջնության խմբային փուլի երրորդ տուրի վերջին հանդիպումները՝ G եւ H խմբերում։ G խմբում կհանդիպեն Անգլիան ու Բելգիան եւ Պանաման ու Թունիսը։ H խմբում կմրցեն Սենեգալն ու Կոլումբիան և Ճապոնիան ու Լեհաստանը։ Անգլիայի եւ Բելգիայի դիմակայությունում ֆավորիտ են անգլիացիները: Պանամա - Թունիս խաղում առավելություն է տրվում թունիսցիներին։ Սենեգալի հնարավոր հաղթանակը Կոլումբիայի հավաքականի նկատմամբ առավել բարձր է։ Ճապոնիա - Լեհաստան խաղում ֆավորիտն են ճապոնացիները։