Ռուսաստանում ընթացող Ֆուտբոլի աշխարհի առաջնության խմբային փուլի երկրորդ տուրի հանդիպումները շարունակվում են։ Նախօրեին տեղի ունեցան E խմբի երկու եւ D խմբի մեկ հանդիպումները։ D խմբում մրցեցին Նիգերիան եւ Իսլանդիան, որտեղ նիգերիացիները 2։0 հաշվով հաղթանակ տարան։ Այս խմբում 1/8 եզրափակիչ անցնողները կորոշվեն երրորդ տուրի խաղերով, քանի որ թիմերը միավորներով մոտ են իրար։ Խորվաթիան ունի 6 միավոր, Նիգերիան՝ 3, Արգենտինան ու Իսլանդիան՝ 1-ական միավոր։ E խմբում դիտարժան էր Բրազիլիա-Կոստա Ռիկա հանդիպումը։ Բրազիլացիները հաղթանակը բառացիորեն «պոկեցին» խաղի վերջին վայրկյանին։ Խաղի հաշիվը 0։0 էր, եւ մրցավարի ավելացրած ժամանակում բրազիլացիներին հաջողվեց երկու գնդակ խփել եւ 2։0 հաշվով հաղթանակ տանել։ Գոլերի հեղինակ դարձան Նեյմարն ու Կոուտինյոն։ Այս խմբի մյուս հանդիպումը Սերբիա-Շվեյցարիա հանդիպումներն էր, որտեղ շվեյցարացիները 2։1 հաշվով հաղթանակ տարան։ Այս խմբում առաջատարները Բրազիլիան ու Շվեյցարիան են՝ 4-ական միավորով, Սերբիան ունի 3 միավոր, Կոստա-Ռիկան՝ 0։ Այսօր տեղի կունենան հետեւյալ հանդիպումները։ Կմրցեն F խմբում ընդգրկված Մեքսիկան ու Հարավային Կորեան  եւ Գերմանիան ու Շվեդիան։ G խմբում կմրցեն Բելգիան ու Թունիսը: Բելգիայի եւ Թունիսի դիմակայությունում ֆավորիտ են եվրոպացիները: Մեքսիկա - Հարավային Կորեա խաղում առավելություն է տրվում մեքսիկացիներին: Գերմանիայի հնարավոր հաղթանակը Շվեդիայի հավաքականի նկատմամբ գնահատվում է ավելի բարձր: