Արցախի հերոս, ԵԿՄ վարչության նախագահ Մանվել Գրիգորյանի փաստաբան Լեւոն Բաղդաարյանը բաց նամակով դիմել է ՀՀ վարչապետ Նիկոլ Փաշինյանին: Դրանում, մասնավորապես, ասված է.
«Մեծարգո վարչապետ, Դուք այսօր վայելում եք ոչ միայն ՀՀ քաղաքացիների, այլ նաև համայն հայության բացարձակ աջակցությունը: Այսօր բազմաթիվ դեմոկրատական երկրների առաջնորդներ կերազեին իրավամբ վայելել ժողովրդի այնպիսի աջակցություն, ինչպիսին որ Ձերն է:
Ցանկանում եմ հավատալ, որ Դուք ցանկանում եք կառուցել այն Հայաստանը, որ իմ պատկերացումներով պետք է լինի արևային Հայաստան, որը լինելու է նորագույն աշխարհի օրինակելի մոդելը: Վայելելով ժողովրդի բացարձակ մեծամասնության սերը և հարգանքը՝ Ձեր հրապարակային ցանկացած հայտարարություն շատերի մոտ ընդունվում է որպես 100 տոկոսանոց ճշմարտություն:
Այսօր Ձեր խոսքի ուժը այնքան հզոր է, որ կարող եք հերոսին ներկայացնել որպես ազգի տականք, իսկ տականքին՝ ազգի հերոս: Օրեր առաջ Ձեր ֆեյսբուքյան ուղիղ եթերով հայտարարեցիք հետևյալը, որ Մանվել Գրիգորյանի ձերբակալությունը միայն կապված չէ զենք-զինամթերքի հետ, Մանվել Գրիգորյանի ձերբակալությունը կապված է այն կասկածների հետ, որ նա մասնակցություն ունի և ներգրավված է եղել ապրիլյան պատերազմի ժամանակ սնունդ յուրացնելու, գողություն անելու մեջ:
Այնուհետև, խորացնելով Ձեր միտքը, մատ եք թափ տալիս դատարանների վրա՝ ասելով՝ անկախ եք, բայց նայեք, հանկարծ չսխալվեք, ստուգելու ենք և այլն: Ի՞նչ եք կարծում, ըստ իս՝ Ձեր կանխակալ կարծիքը լսելուց հետո հին մեթոդներով աշխատող և իներցիայով շարժվող պետական լիազոր մարմինները և դատարանները ի՞նչ պետք է անեն: Օրենքի կոպտագույն խախտումներով անգամ կամակատար դատարանը իր որոշումներից մեկում մոռացել էր ամսաթիվ դնել որոշման տակ:
Ձերբակալում են բազմաթիվ հիվանդություններ ունեցող անձին և կալանավորում են: Ձեր հայտարարությունից հետո հասարակության մի լայն զանգված ատելությամբ է լցվում դեպի Մանվել Գրիգորյանն ու նրա ընտանիքը, համացանցը լցվում է նրա և նրա մերձավորների ընտանիքների նկատմամբ հաշվեհարդարի կոչերով, սպառնալիքներով, ընդհուպ՝ հաշվեհարդարի կոչերով նրա կողքին կանգնող իրավապաշտպանների նկատմամբ:
Ավելին, Ձեր հայտարարությամբ Դուք խոսում եք գողության, յուրացման մասին, երբ քրեական գործում այդ ժամանակ եղել է միայն ապօրինի զենք-զինամթերք պահելու կասկած: Ժամանակին երկրորդ նախագահը հոկտեմբերի 27-ի գործով հրապարակային հայտարարեց, որ դա «ուչաստկովիի գործ» է և ըստ էության՝ ուղղորդեց նախաքննությանը, որի իրավունքը չուներ: Այսօր Դուք հրապարակայնորեն մեղադրում եք անձին՝ առանց օրինական ուժ ստացած դատական ակտի, որի իրավունքը Դուք ևս չունեք:
Եթե անձը մեղադրվում է առերևույթ ծանր հանցագործություն կատարելու մեջ, և դա երկրի առաջին դեմքի կողմից հրապարակայնորեն հայտարարվում է, որից հետո պետական լիազոր մարմինները լծվում են Ձեր ասածը սրբագրելու, ապա փաստում եմ, որ Հայաստանում նմանօրինակ հնչեղ գործերով չի կարող լինել արդարադատություն:
Ստեղծեք նախորդ դարի 30-ական թվականների տրոյկաները, իսկ մեղադրվող անձին հրապարակայնորեն կախեք, վառեք, քառատեք:
Մեծարգո պարոն վարչապետ, անկախ անձի կատարած հանցանքի տեսակից ու չափից, երբ նա ունի կալանքի հետ կապված անհամատեղելի հիվանդություններ, պետության կողմից նրան կալանավորելը դիտվում է ծանր հանցագործություն և համարվում է խոշտանգում այդ անձի նկատմամբ:
Դիմելով Ձեզ՝ ակնկալում եմ.
- հրապարակային հանդես գալ և կոչ անել ժողովրդին՝ դադարեցնել տարբեր բնույթի ու տեսակի հաշվեհարդարների կոչերը Մանվել Գրիգորյանի և նրա ընտանիքի, մերձավորների նկատմամբ,
- հրապարակայնորեն դիմել իրավապահ մարմիններին՝ կատարելու օբյեկտիվ քննություն, և եթե կապացուցվի անձի կամ անձանց մեղքը այդ զազրելի հանցագործության մեջ, պատժել օրենքի ողջ խստությամբ,
- հանձնարարել, որպեսզի տան բժշկական օբյեկտիվ եզրակացություն Մանվել Գրիգորյանի կալանքի օրինաչափությանը՝ կապված իր հիվանդությունների հետ,
- հաշվի առնելով, որ Մանվել Գրիգորյանին հրապարակայնորեն մեղադրել եք մի բանում, որը պետք է ապացուցվի միայն դատարանի՝ օրինական ուժի մեջ մտած դատական ակտով, որը Ձեր հայտարարության պահին բացակայել է, որով վիրավորել և զրպարտել եք Մանվել Գրիգորյանի պատիվն ու արժանապատվությունը, հրապարակային ներողություն խնդրեք Մանվել Գրիգորյանից,
- հրապարակային հայտարարեք, որ Մանվել Գրիգորյանի պաշտպաններին չվիրավորեն, չահաբեկեն, չնույնականացնեն իրենց պաշտպանյալի հետ, հայտարարեք, որ արդարադատության, իրավունքի կայացման գործում հեգեմոն դեր ունի իրավապաշտպանը:
Մեծխարգո պարոն վարչապետ, տարիներ առաջ իրավապաշտպան ոլորտում, երբ իրավական հարթության վրա պայքարում էիք անարդար ընտրությունների, A1+-ի եթերազրկման, հանիրավի մեղադրվող քաղաքական գործիչների կողքին, շատ քիչ լրատվամիջոցներ էին համարձակվում լուսաբանել իմ դատական պրոցեսները, որոնց թվում էր նաև Ձեր կողմից ղեկավարվող լրատվամիջոցը, որոնք համարձակություն էին ունենում գրելու և օբյեկտիվ լուսաբանելու:
Այսօր շատ բան է փոխվել Հայաստանում. այս փոփոխությունը մենք ձեռք ենք բերել տարիների մեր քրտնաջան աշխատանքով, հաճախ լինելով չհասկացված, արհամարհված, փոքրամասնություն, իրավամբ՝ Դուք եք կրողը նոր Հայաստանի՝ Ձեր ետևում ունենալով զտարյուն հայորդիների մի զանգված, որ օր օրի ավելանալու է, եթե գիտակցի, որ իրավունքը գիտություն է բարու և արդարի մասին, եթե գիտակցի, որ ընկածին չեն խփում, եթե գիտակցի, որ վաղուց հաշվեհարդարների ժամանակը անցել է, և մեղավորներին օրենքով սահմանված կարգով միայն պետք է պատժեն, և որ այս ամենի երաշխավորը միայն Դուք եք»:
