ՀՀ էկոնոմիկայի նախարար Գևորգ Պապոյանն օգոստոսի 31-ին այցելել է «Արարատ» սննդի կոմբինատ ՍՊԸ՝ մթերումների ընթացքին տեղում հետևելու նպատակով։

Այս մասին հայտնում է ՀՀ էկոնոմիկայի նախարարությունը՝ նշելով, որ այցին մասնակցել է նաև նախարարի տեղակալ Արման Խոջոյանը։

Գերատեսչությունից նշում են, որ ընթացիկ սեզոնին ընկերությունը դեղձի մթերումն իրականացնում է 175 դրամ/կգ գնով։ Այս պահին արդեն մթերվել է շուրջ 2500 տոննա դեղձ, իսկ տարվա ընթացքում նախատեսվում է մթերել 6,5-7 հազար տոննա։

Ընկերությունը տարեկան նախատեսում է արտադրել շուրջ 7 մլն միավոր պահածոյացված սննդամթերք և 5-7 մլն միավոր բնական հյութ։

Ընկերությունն օգտվել է մթերման գործընթացն անխոչընդոտ ապահովելու նպատակով տրամադրվող պետական աջակցության ծրագրից։ Դեղձից բացի, ընկերությունը մթերում և վերամշակում է նաև սմբուկ, լոլիկ, խնձոր, սալոր և այլն։

Արտադրանքն արտահանվում է մի շարք երկրներ, այդ թվում՝ Ռուսաստան, ԱՄՆ, Գերմանիա, Բալթյան երկրներ, Ռումինիա, Իսրայել և Ղազախստան։ Հիմնադրման օրվանից ի վեր ընկերությունում իրականացվել է շուրջ 25 մլն ԱՄՆ դոլարի ներդրում, աշխատակիցների թիվը հասնում է 100-ի։

«Արարատ» սննդի կոմբինատ ՍՊԸ-ն հիմնադրվել է 2011 թվականին և հյութերի ու պահածոների արտադրության ոլորտի առաջատար ընկերություններից է։ Արտադրանքը թողարկվում է Ararat, Armenium, Ararat Premium, Ararat Tea և Noah’s Ark ապրանքանիշերի ներքո։