Մոսկվան սադրիչ է համարում Հայաստանի Անվտանգության խորհրդի քարտուղար Ալեն Սիմոնյանի հայտարարությունները ռուսաստանցիների մասին՝ Ռուսաստանում հնարավոր զորահավաքի վերաբերյալ պաշտոնատար անձանց կողմից բազմիցս հերքված շահարկումների ֆոնին: Այս մասին ասվում է ՌԴ ԱԳՆ պաշտոնական ներկայացուցիչ Մարիա Զախարովայի մեկնաբանության մեջ, հայտնում է ՏԱՍՍ-ը։
Դիվանագետը ուշադրություն է հրավիրել Սիմոնյանի հայտարարության վրա, թե հանրապետությունը իբր պատրաստ է ընդունել ռուսաստանցի քաղաքացիների նոր ալիք, որոնք ցանկանում են խուսափել ճակատ ուղարկվելուց:
«Ցավով ենք նշում, որ Պաշտոնական Երևանի ներկայացուցիչների կողմից Մոսկվայի հետ երկկողմ համագործակցությունը խաթարող հրապարակային հայտարարությունների տարածման միտումը շարունակվում է: Սիմոնյանի հայտարարությունները համարում ենք սադրիչ: Ըստ էության, դրանք խրախուսում են Ռուսաստանի քաղաքացիներին հակաօրինական գործողությունների և ավանդական հայկական հյուրընկալությանը տալիս են թունավոր քաղաքական երանգ»,- նշել է Զախարովան։
Զախարովան ընդգծել է, որ ռուսական կողմը Սիմոնյանի հիշատակված մեկնաբանություններում տեսնում է հանրապետության իշխանությունների՝ Արևմուտքին և Կիևի ռեժիմին ծառայելու ձգտման ևս մեկ ապացույց:
«Այս անգամ օտարերկրյա գործակալ-լրագրողի հետ ուղիղ եթերում նորաօծ Անվտանգության խորհրդի քարտուղարը տեղի տվեց գիտակցաբար սադրիչ ձևակերպված հարցին, որը նրան ներքաշեց ուկրաինական խունտայի և նրա արևմտյան հովանավորների կողմից հրահրված շահարկումների մեջ՝ մեր երկրում հնարավոր զորահավաքի վերաբերյալ, որոնք բազմիցս հերքվել են Ռուսաստանի պաշտոնատար անձանց կողմից», - ամփոփել է նա:
