Օգոստոսի 13-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսն ընդունեց Արագածոտնի թեմի քահանայից դասին ու նրանց ընտանյաց անդամներին։

Արագածոտնի թեմի վարչական խորհրդի ատենապետ Հոգեշնորհ Տ. Շնորհք աբեղա Պալոյանն իր երախտագիտությունը հայտնեց Վեհափառ Հայրապետին հանդիպման և մշապես ցուցաբերվող հայրական խնամքի համար։

Թեմի քահանաներից Արժանապատիվ Տ. Մկրտիչ քահանա Երանյանը, հայցելով Նորին Սրբության օրհնությունը, ընդգծեց, որ նման ընդունելությունը կարևոր առիթ է ուխտը վերանորոգելու և Հայոց Հայրապետին ու Մայր Աթոռ Սուրբ Էջմիածնին վերստին իրենց հավատարմությունը հայտնելու համար։

Իր խոսքում Վեհափառ Հայրապետը կարևորեց նմանատիպ հանդիպումները, որոնք լավ առիթ են եկեղեցականաց հետ հոգևոր կապն առավել ամրապնդելու և իրենց ընտանյաց անդամների հետ հաղորդակցվելու համար։

Նորին Սրբությունը գոհունակությամբ անդրադարձավ նաև Արագածոտնի թեմի քահանայից դասի հոգեխնամ, կարևոր ու նվիրական ծառայությանը և բարձր գնահատեց ստեղծված դժվարին իրավիճակում նրանց դրսևորած անմնացորդ նվիրումը։

Այնուհետև Ամենայն Հայոց Կաթողիկոսը պատասխանեց ներկաների հարցերին, որոնք վերաբերում էին Եկեղեցու առջև ծառացած մարտահրավերներին և Մայր Աթոռի գործուներությանը։

Հանդիպման ավարտին Նորին Սրբությունը հայրապետական իր օրհնությունը բերեց քահանաներին և նրանց ընտանյաց անդամներրին՝ մաղթելով քաջառողջություն ու բարօր կյանք։