ԱՄՆ-ում Մեծ Բրիտանիայի նախկին դեսպան Պիտեր Մանդելսոնի հիմնադրած Global Counsel խորհրդատվական ընկերությունը կանցնի արտաքին կառավարման՝ ամերիկացի ֆինանսիստ Ջեֆրի Էպշտեյնին վերաբերող նյութերի հրապարակումից հետո առաջացած ֆինանսական դժվարությունների պատճառով: Իրավիճակի մասին հայտնել է Financial Times (FT) պարբերականը:
Պարբերականի տվյալներով՝ Global Counsel-ի նախագահ Արչի Նորմանը և գլխավոր գործադիր տնօրեն Ռեբեկա Պարկը հինգշաբթի աշխատակիցներին տեղեկացրել են, որ «Փիթեր Մանդելսոնի ժառանգությունը» լուրջ վնաս է հասցրել ընկերության բիզնեսին: Արտաքին կառավարումը, ինչպես սպասվում է, կսկսվի փետրվարի 20-ին:
Ինչպես նշում է Financial Times-ը, խոշոր հաճախորդները սկսել են հեռանալ, երբ հայտնի դարձավ, որ Մանդելսոնը խորհրդակցել է Էպշտեյնի հետ՝ 2010 թվականին ընկերությունը գործարկելիս:
Անցյալ շաբաթ ընկերության համահիմնադիրներից մեկը՝ Բենջամին Վագ-Պրոսերը, հրաժարական է տվել գործադիր տնօրենի պաշտոնից: Ըստ տեղեկությունների՝ նա Էպշտեյնի հետ քննարկել է բիզնես ծրագրերը, երբ նա տնային կալանքի տակ էր Նյու Յորքում: Մանդելսոնը հրաժարվել է Global Counsel-ի օպերատիվ կառավարումից՝ ԱՄՆ-ում Մեծ Բրիտանիայի դեսպան նշանակվելուց հետո, սակայն պահպանել է ընկերության զգալի մասնաբաժինը:
Financial Times-ը հավելում է, որ ընկերությունն աշխատանքի է վերցնում ավելի քան 100 մարդու Բեռլինում, Բրյուսելում, Վաշինգտոնում, Դոհայում, Լոնդոնում և Սինգապուրում: Իրենց գործընկերությունը դադարեցրած խոշոր հաճախորդների թվում են Barclays բանկը, Tesco սուպերմարկետների ցանցը և Անգլիայի ֆուտբոլի Պրեմիեր լիգան:
Փիթեր Մանդելսոնը նշանակվել է Մեծ Բրիտանիայի դեսպան ԱՄՆ-ում 2025 թվականի փետրվարին, սակայն հրաժարական է տվել սեպտեմբերին՝ Էպշտեյնի հետ նրա կապերի մասին նոր տեղեկություններ հրապարակվելուց հետո: Նա երկար ժամանակ համարվում էր Մեծ Բրիտանիայի Լեյբորիստական կուսակցության ամենաազդեցիկ ներկայացուցիչներից մեկը:
