Իսրայելի վարչապետ Բենիամին Նեթանյահուն հրահանգել է ուժեղացնել անվտանգության միջոցները ինչպես իսրայելական, այնպես էլ օտարերկրյա ավիաընկերությունների համար, որոնք թռիչքներ են իրականացնում դեպի Իսրայել և այնտեղից։ Որոշումը կայացվել է Flydubai-ի Դուբայ-Թել Ավիվ FZ1073 չվերթում տեղի ունեցած վտանգավոր միջադեպից հետո։
Իսրայելի վարչապետի գրասենյակի ներկայացուցիչը հայտնել է, որ նախատեսվում է խստացնել հատկապես օդաչուների անվտանգության ստուգումները։ Նեթանյահուի խոսքով՝ Իսրայել թռչող յուրաքանչյուր օդաչուի ինքնությունն ու կենսագրական տվյալները պետք է ավելի մանրամասն ստուգվեն։
Այս որոշմանը նախորդել էր Flydubai-ի չվերթում օդաչուների խցիկում տեղի ունեցած միջադեպը։ Ըստ իսրայելական կողմի՝ երկրորդ օդաչուն դանակահարել էր օդանավի հրամանատարին և ենթադրաբար փորձել էր կործանել ինքնաթիռը։ Flydubai-ն իր հերթին պաշտոնապես հաստատել է միայն օդաչուների խցիկում տեղի ունեցած բախումը և այն, որ ինքնաթիռը անվտանգ վայրէջք է կատարել Սաուդյան Արաբիայի Տաբուք քաղաքում։ Հարձակման շարժառիթը դեռ վերջնականապես հաստատված չէ։
Նեթանյահուն նաև հայտնել է, որ անվտանգության կառույցներին հանձնարարել է պատրաստվել հնարավոր լրացուցիչ սպառնալիքների։ Նրա խոսքով՝ Flydubai-ի միջադեպը Իսրայելը դիտարկում է որպես չափազանց լուրջ անվտանգության միջադեպ։
