Այսօր Բաքվի դատարանում շարունակվել է Ադրբեջանում ապօրինի ձերբակալված՝ Արցախի նախկին պետնախարար Ռուբեն Վարդանյանի դեմ կեղծ գործերով հարուցված շինծու դատական նիստը:
Ըստ ադրբեջանական ԶԼՄ-ների՝ նրա փաստաբանը երկու նոր միջնորդություն է ներկայացրել, որոնք մնացել են առանց քննության:
Մասնավորապես նշվում է, որ Էմիլ Բաբիշովը (ավելի վաղ հաղորդվել էր, որ Վարդանյանը հրաժարվել է նրա ծառայություններից) խնդրել է արժանահավատ չհամարել այսպես կոչված «տուժողների», այդ թվում՝ Կամո Հայրապետյանի և Մուշեղ Գրիգորյանի ցուցմունքները: Նա նաև հայտարարել է, որ ցուցմունքների մի մասը կապ չունի «մեղադրյալի» հետ։
Վարդանյանն ինքը խնդրել է գործին կցել մի շարք փաստաթղթեր, ինչպես նաև ծանոթանալ քրեական գործի 15 հատորներին. դատարանը բավարարել է խնդրանքը: Մյուս խնդրանքը՝ այդ հատորներում հիշատակված վկաներին դատարան կանչելու մասին, մերժվել է։
Հաղորդվում է, որ հաջորդ կեղծ «դատական» նիստը կանցկացվի դեկտեմբերի 16-ին:
