Դատախազությունը լրտեսության մեղադրանք է առաջադրել Իսրայելի քաղաքացու դեմ, որը կասկածվում է իսրայելական ռազմական պլանների մասին գաղտնի տեղեկություններ իրանական հետախուզության գործակալին փոխանցելու մեջ, հայտնում է Times of Israel-ը։
Կասկածյալի անունը և նույնականացնող մանրամասների մեծ մասը չեն հրապարակվում։
Հաղորդվում է, որ նա 1999 թվականին Իրանից ներգաղթել է Իսրայել և ավելի քան տասը տարի անց՝ Թուրքիա կատարած այցի ժամանակ, վերականգնել է կապերն իր հայրենիքի հետ, երբ այցելել է Իրանի դեսպանատուն։
Դրանից անմիջապես հետո մեղադրյալը հարաբերությունների մեջ է մտել Իրանում բնակվող իրանցի կնոջ հետ։ Նա իրանցի օպերատիվ աշխատակիցների հետ կապ է հաստատել իր զուգընկերուհու միջոցով, որի հետ կապվել է գործակալը և խնդրել կազմակերպել իր և մեղադրյալի հանդիպումը։ Ըստ դատախազների, մեղադրյալը 2024 թվականի սեպտեմբերին երկու իրանցի օպերատիվ աշխատակցի հետ հանդիպել է Թուրքիայում իր սիրեցյալին այցելելու ժամանակ։
Իսրայել վերադառնալուց հետո նա կապ է պահպանել գործակալներից մեկի հետ Telegram հաղորդագրությունների փոխանակման հավելվածի միջոցով, պնդում է մեղադրող կողմը։
Դատախազությունը պնդում է, որ մեղադրյալն օգտվել է մեկ այլ իսրայելցու հետ իր բարեկամությունից, որը, ենթադրաբար, կապեր ունի կառավարական գործիչների հետ։
Մեղադրյալի հանցակիցը նաև, իբր, կապեր է պահպանել իրանցի քիմիկոսի հետ, որը հետախուզական տվյալներ է տրամադրել, որոնք կարող էին օգնել Իսրայելին Իրանի դեմ պայքարում։
Նա մեղադրյալին խնդրել է օգնել քիմիկոսի հետ իր նամակագրությունը պարսկերենից եբրայերեն թարգմանել։ Ըստ մեղադրական եզրակացության, կասկածյալը մատնել է իրանցի քիմիկոսին հետախուզության գործակալին՝ ներկայացնելով այն տեղեկությունները, որոնք նրան խնդրել էին թարգմանել, և իր կոնտակտային անձին խորհուրդ տալով «հսկել նրան»։
2025 թվականի մայիսին՝ Իրանի վրա Իսրայելի օդային հարձակումից մեկ ամիս առաջ, մեղադրյալը, իբր, իր իրանցի կոնտակտային անձին հայտնել է, որ Իսրայելը նախատեսում է հարձակում գործել Իրանի վրա։
Ավելի ուշ նա գործակալին հայտնել է, որ Իսրայելը դիվերսիոն գործողություն է նախատեսում Իսլամական Հանրապետության միջուկային օբյեկտների դեմ։ Ոստիկանությունը կասկածյալին ձերբակալել է հուլիսի 1-ին։ Լոդի շրջանային դատարանը նրան մեղադրանք է առաջադրել օտարերկրյա գործակալի հետ կապեր պահպանելու և պետական անվտանգությանը վնաս հասցնելու մտադրությամբ թշնամուն հետախուզական տվյալներ փոխանցելու համար։
