ԱԺ «Պատիվ ունեմ» խմբակցության պատգամավոր, Գյումրու քաղաքապետի նախկին թեկնածու Մարտուն Գրիգորյանը այսօր վերահաստատել է՝ իր թիմակիցների, իր շրջապատի նկատմամբ ճնշումներ են իրականացվում, ՔՊ-ն չի կարողանում հաշտվել Գյումրիում իր կրած պարտության հետ և դիմում է այսպիսի քայլեի, սակայն արժանի պատասխան ստանալու է։
«Լուրջ ճնշում է սկսվել, աշխատանքից ազատում են իմ թիմակիցներին, բարեկամներին, ընկերներին։
Կան աշխատանքից անհիմն ազատված մարդիկ, որոնք կոնկրետ ասոցացվում են ինձ հետ, և ես առաջիկայում սպասում եմ էլի պրոցեսների, որի արդյունքում հավաքական մի հատ էլի պատասխան կստանան այդ քայլերի համար»,- ասել է Մարտուն Գրիգորյանը։
Նա շեշտել է՝ հասկանալի է՝ ՔՊ-ն չի մարսում պարտությունը, բայց պարտավոր է հաշվի նստել գյումրեցիների կարծիքի ու դիրքորոշման հետ, ընտրությունների ժամանակ ստացած քվեների քանակի հետ։
«Գյումրի քաղաքում 47 հազար մարդ մասնակցել է ընտրություններին, 17 հազարը քվեարկել է նրանց օգտին, մնացածը «Քաղաքացիական պայմանագիր» չեն ուզել։ ՔՊ-ին չուզող ժողովուրդը Գյումրիում շատ ավելին է»,-շեշտել է Գրիգորյանը։
Ինչ վերաբերում է ՔՊ-ի հայտարարություններին՝ իբրև իրենք «հաղթել են», Մարտուն Գրիգորյանը նշել է․ «Դե, թող ուրախանան այդ «հաղթանակով», բա ինչու՞ են խառնվել իրար, ինչո՞ւ են ուզում Գյումրի քաղաքը տակնուվրա անել»։
