Սուտն ու մանիպուլյացիան դարձել է այս իշխանության անբաժանելի մասը։ Ամոթաբար ուղիղ եթերում գոյություն չունեցողը որպես բացարձակ ճշմարտություն ներկայացնելու և սեփական անգործությունը այլոց վրա բարդելու առաջամարտիկներից է նաև Երևանի քաղաքապետ Տիգրան Ավինյանը։ Այսօր գործակարգավարական նիստի ժամանակ, քաղաքագլուխը հայտարարեց, թե ձնամաքրման աշխատանքները վատ են իրականացվել, որովհետև ամբողջ քաղաքը ՃՏՊ–ների մեջ է եղել։ Ըստ Ավինյան Տիգրանի ձյուն մաքրող մեքենաները ժամանակին տեղ հասնել չեն կարողացել, որովհետև վարորդների մեծ մասը երթեւեկել է ամառային անվադողերով, ինչի արդյունքում տեղի են ունեցել վթարներ։
«Ձյան տեղումների առաջին օրը տեխնիկայի ուշացման հետևանքով եղել է ծանր խցանում, բայց խցանումների 80 տոկոսը պայմանավորված էին վթարներով, ինչը ամառային անվադողերով վարելու հետևանք է: Մյուս խնդիրը ԱՊՊԱ համակարգի աշխատանքի տրամաբանությունն է, որ մի թեթև իրար «քսելու» պատճառով ժամերով սպասել ու ստեղծել հերթեր։ Եւ մարդիկ մեղավոր չեն, այդ համակարգը Երևան քաղաքի համար աղետ է»,-ասել էր Ավինյանը, հավելելով, թե 10 000, 30 000 դրամ վնասի համար ճանապարհ է փակվում։
Մինչդեռ վերջին օրերին տեղի ունեցած ՃՏՊ–ների վիճակագրությունը փաստում է, որ վթարները որեւէ կապ չունեն ամառային անվադողերով երթեևեկելու հետ, որովհետև վարորդները մեքենաները վարում են ձմեռային անվադողերով։ Այսպես փետրվարի 20-ից 24-ը՝ մինչև ժամը 08։00-ն, Երևանում արձանագրվել է ճանապարհատրանսպորտային 482 պատահար։ Նշված 482 պատահարների հաշվառմամբ՝ 1 տրանսպորտային միջոց եղել է ամառային անվադողերով, իսկ 8 մեքենա եղել է ձմեռային մաշված անվադողերով։ Միաժամանակ՝ նույն ժամանակահատվածում Երևանում պարեկները ստուգել են 193 տրանսպորտային միջոց, որոնցից 15-ը եղել են ձմեռային մաշված անվադողերով։
Այս վիճակագրությունը փաստում է, որ Ավինյանը ուղիղ եթերում կեղծ տեղեկություն է տվել, փորձել է սեփական կառավարման անարդյունավետությունը բարդել այլոց վրա, մինչդեռ ակնհայտ է, որ այս իշխանութունը, ինչպես մյուս բոլոր պարագաներում, այս անգամ ևս թերացել է իր աշխատանքում։
Հ․Գ․ Միաժամանակ պետք է «շնորհակալություն հայտնել Տիգրան Ավինյանին, ի վերջո կարող էր չէ հոր նման հայտարարել, թե օփելի «համբալ» վարորդներն են մեղավոր, որ համարձակվել են այդ օրը գալ Երևան, այն էլ՝ ամառային անվադողերով։
Irakanum.am
