Ռուսական կողմը պատրաստ է հարթակ տրամադրել Բաքվի և Երևանի ներկայացուցիչների միջև բանակցությունների համար և կստեղծի նրանց համար առավել հարմարավետ պայմաններ, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Ձեռք բերված պայմանավորվածությունների համաձայն` Մոսկվան բազմիցս ընդունել է խաղաղության պայմանագրի նախագծի շուրջ հայ-ադրբեջանական բանակցությունների փուլերը, մենք պատրաստ ենք, մենք միշտ դա ընդգծել ենք»,- նշել է նա:
Դիվանագետն ընդգծել է` երաշխավորում են առավել հարմարավետ պայմանների ստեղծումը երկու պատվիրակությունների համար՝ իրենց նախընտրած երկկողմ ձևաչափով:
«Մենք մեր դաշնակիցների միջև հավասարակշռված խաղաղության պայմանագրի կնքումը դիտարկում ենք որպես տարածաշրջանում անվտանգության և կայուն տնտեսական զարգացման ճարտարապետության կառուցման նախապայման», - ասել է Զախարովան։
Նա հույս է հայտնել, որ առկա տարաձայնությունները շուտափույթ կլուծվեն և հայ-ադրբեջանական հարաբերությունների կարգավորման գործընթացում հաջող առաջընթաց կգրանցվի` ամենաբարձր մակարդակով երկկողմ պայմանավորվածություններին համապատասխան: