Մի խումբ իրավապաշտպաններ նամակներ էին հղել Հայաստանում հավատարմագրված օտարերկրյա դիվանագիտական ներկայացուցչություններին՝ մեր երկրում տեղ գտնող մարդու իրավունքների կոպիտ խախտումների վերաբերյալ։ Նամակներին որոշ արձագանքներ են ստացվել։ Այդ մասին հայտնել է իրավապաշտպան Ռուբեն Մելիքյանը։

«Հայաստանում հավատարմագրված դեսպաններին հինգ իրավապաշտպանների դիմումին ի պատասխան՝ ստացել ենք մի քանի արձագանքներ։ Այսօր ես և իրավապաշտպան Արսեն Բաբայանը հանդիպում ենք ունեցել Գերմանիայի Դաշնային Հանրապետության փոխդեսպան պարոն Էրիկ Թինտրուպի հետ։ Պարոն փոխդեսպանին ներկայացրել ենք ժողովրդավարության ու մարդու իրավունքների հարցերում Հայաստանում առկա և գնալով ահագնացող խնդիրները, քաղբանտարկյալների և այլ քաղաքական հալածյալների գործերը։ Հուսով ենք, որ բարձրացված խնդիրները կլինեն միջազգային գործընկերների ուշադրության կենտրոնում»,- գրել է իրավապաշտպանը։