Իշխող «Վրացական երազանք» կուսակցության համագումարում կուսակցության պատվավոր նախագահ է ընտրվել դրա հիմնադիր, Վրաստանի նախկին վարչապետ Բիձինա Իվանիշվիլին։
Ելույթ ունենալով համագումարին՝ Իվանիշվիլին հայտարարել է, որ որոշել է վերադառնալ քաղաքականություն՝ կապված երկրի առջև ծագած բազմաթիվ մարտահրավերների հետ։
«Այս պայմաններում անգամ նվազագույն սխալը կարող է լուրջ վնաս հասցնել երկրին։ Վրաստանի համար գլխավոր ազգային նպատակներ են շարունակում մնալ ինքնիշխանության վերականգնումը և երկրի միավորումը, ինտեգրումը Եվրամիությանը»,- ասել է Իվանիշվիլին։
Քաղաքականությունից հեռանալու որոշում Վրաստանի նախկին վարչապետը կայացրել էր մի քանի տարի առաջ։
