armtimes.com-ը գրում է. «Հունիսի 1-ին Երևանի Սվաճյան փողոցի շենքերից մեկի 6-րդ հարկից մանկահասակ երեխայի հետ ընկած կինը լրագրող և բլոգեր Օվսաննա Սողոյանն է (Սիմոնյան):
Համացանցում Օվսանայի ընկերն ու լրագրողները կատարվածը համարում են անհավատալի և անհասկանալի: Երիտասարդ կնոջ ընկերները ցավակցություններից բացի, Օվսաննայի հետ կապված հիշողություններով են կիսվում և նշում, որ նա բազմաթիվ նոր ծրագրեր ուներ իրականացնելու, որոնց մասին բազմիցս խոսել է բլոգերը:
Դեպքի առթիվ նախաձեռնվել է քրեական վարույթ սպանության եւ ինքնասպանության հասցնելու հատկանիշներով։
Հիշեցնենք՝ հունիսի 1-ին, ողբերգական դեպք էր տեղի ունեցել Երևանում։ Ժամը 12։00-ի սահմաններում ՀՀ ներքին գործերի նախարարության Ոստիկանության Մալաթիայի բաժին ահազանգ էր ստացվել, որ Սվաճյան փողոցի շենքերից մեկի 1-ին հարկի տանիքում կնոջ դի կա, և վիրավոր երեխա։
Ոստիկաններն ու քննիչները պարզել էին, որ նշված վայրից ծայրահեղ ծանր վիճակում բժիշկները հիվանդանոց էին տեղափոխել մոտ 1 տարեկան տղա երեխայի։ Տեղում հայտնաբերվել էր երիտասարդ կնոջ դի։
Երեխան կլինիկական մահվան վիճակով տեղափոխվել էր վերակենդանացման բաժանմունք, կատարվել էին վերակենդանացման միջոցառումներ, որոնք եղել էին անարդյունք: Փոքրիկը, գիտակցության չգալով, մահացել էր:
